千祈唔好嘗試放曱甴屋喺自己房…

 

相信大家都清楚,曱甴係一種幾仆街嘅生物。
話說十年前嘅一個夏天,當日落好大雨,我企喺路邊等緊小巴,頭頂簷蓬因為雨水負荷過重,突然一灘水兜頭淋咗落我度。濕身唔緊要,最大問題係我身後個阿叔彈開,指住我個身大叫「嘩哥仔你個身好撚多曱甴!」

我低頭一望,真係好撚多隻曱甴爪住我件衫!
嗰一刻,我全身每一吋毛孔都喺度講緊粗口,曱甴敏捷度又高,抓力又強,我完全趕佢哋佢唔走,我直頭有衝動想訓喺地下翻滾,嚟個玉石俱焚。

最後,佢哋蹂躪完我一輪,先依依不捨咁離開。

呢件事之後,我就好撚驚曱甴。近排天氣熱到想裸跑,話說有一晚,我半夜起身屙夜尿,行出廳就見到有隻巨型曱甴,喺度食緊我老母擺喺枱面啲花生碎。

話說我老母佢每晚都會食住花生睇電視,用個奶粉罐裝住啲花生殼,拎住個罐就由個廳食到入房,直至個罐滿晒先拎去倒。

此外,佢仲係一個非常喜歡園藝嘅人,好鍾意將任何生果嘅核,嘗試種返棵樹出嚟,最近佢就喺廚房種緊車厘子樹。

我曾經勸過佢唔好咁做,佢答我:「痴線啦邊關事,個個屋企都有曱甴嫁啦!」

由細到大,我屋企都成日見到曱甴,我發覺就算我勤做家務,每晚倒花生殼,將屋企清潔得乾乾淨淨,曱甴數目都有增無減。於是,我決定買幾間曱甴屋,擺喺屋企幾個曱甴熱門出沒點。

既然曱甴咁鍾意食我老母啲花生,我索性將啲花生碎平均散佈喺曱甴屋嘅內部,希望可以加強捕捉效果。我總共買咗五盒,最後一盒唔知擺喺邊度好,就擺喺自己房。

兩日後,我後悔了…
我打開間曱甴屋嚟睇,你老味吖!竟然有成十幾隻曱甴!啲腳畀曱甴膠痴實晒,佢哋掙扎到好似跳Disco咁un下un下。

嗰一刻我完全崩潰,我唔能夠接受訓咗幾十年嘅房,竟然會咁多曱甴?!
我平時連零食都盡量唔喺房食,間房塵都唔多粒,我究竟做錯咗啲乜嘢啊啊啊啊!

我拎住間曱甴屋畀老母睇,希望爭取到唔好再儲花生殼同種車厘子。佢話:「你唔好擺曱甴屋咪無事囉,反正咁多你都殺唔晒嫁啦~」

老母一句,我覺悟了!
係我多事,係我唔啱。
就算眼見住自己居住咗幾十年嘅家被昆蟲入侵,即使佢哋食我嘅飯、訓我間房、仲周圍屙屎產卵!而你嘅下一代,仲有可能同曱甴做鄰居、做同學、做朋友添!

但只要唔聽、唔睇、唔理、扮無事發生,照常咁樣返工放工,你依然可以活得好幸福快樂。

 

 

作者:藍橘子

藍橘子
仍未被世人發掘的詭異生果。至今共推出七本個人小說,不停寫作,目標是將荒誕奇怪的故事嵌進讀者的腦裡。若你喜歡怪人,其實我很美。專頁:http://www.facebook.com/BlueGodzi

閱讀後覺得好,請多多讚好及分享~:)

其他熱門文章

  • 我同事笑我唔識用touchpad….. by 緋色雪夜
    「其實你係咪唔識用touchpad?好好用喎~」同事妹妹拎住部macbook坐埋嚟,「不如我教你用touchpad呀。」…
  • 【玩物花絮】正過官方新屋 LEGO集會廣場改建歐陸Jazz Cafe by 阿九
    近期真係冇乜高質素嘅大屋 AMOC 出現喺市面,而官方公佈下年 1 月 3 號正式開賣嘅 10270 Book […]…
  • 你會同另一半講你嘅性史嗎? by 我從不穿睡裙
    講曬出黎,對方真係完全無野,完全接受倒,覺得呢D過去左既野係唔重要的話,我真係恭喜你。但萬一,對方聽完之後唔係咁既話,你要小心了。…
  • 恭喜何君堯終於揾到接班人啦! by 達時製作 (On Time Production)
    何妖能夠孤身(只限香港啫,中國就實有人撐佢嘅)走到今日呢步,殊不簡單。而佢嘅「成功」,亦都感染咗一位等左上位好耐嘅仁兄。佢就係...…
  • How dare you? Because I can. by 諱文
    點都好,首先要恭喜一下Greta本人成為最年輕既年度風雲人物,16之齡得到呢個殊榮證明佢的確厲害;希望佢之後可以真真正正為環境出一分力。點解我會咁講?先唔講佢有班強勁既PR同遊說集團係佢背後撐腰,花少少時間search吓佢背景你就會知得一清…
  • 校服 by 微言
    我對那條藍色裙的認識就只是藍色,及裙,能有什麼改變?可以改動?當然,我相信女生們早已自我分了三、四十派,互相尊重卻各不相讓,守護着自己的傲嬌。老實說,我代表男生們能將她們分為兩派,「短裙」及「一般」兩派。…
歡迎讚好我們的facebook page,免費資訊源源送上。

文章資訊

ID: 138510
Date: 2016-07-18 21:01:14
Generated at: 2019-12-15 22:24:57
Permalink: https://www.vjmedia.com.hk/articles/2016/07/18/138510/千祈唔好嘗試放曱甴屋喺自己房