廣東人做雞有好多方法(一)

廣東人 雞

 

「嘩你睇,最近差佬又掃黃冚左幾個色情場所啦……」

「呢D野成日都發生架啦,有咩咁出奇呢又。」

「唔係喎,你睇,今次話係近年破獲既一個最大既淫窟喎……」

我指住手機上面蘋果動新聞冒即時新聞,拎俾阿頭。

未正式同大家介紹。我叫阿達,係一名廢青。

阿頭係我一齊做豐澤D Friend。佢做手提電腦,我就做Apple野。

兩個通常食完飯,蛇一蛇王,係後巷吹番兩口煙,搔下廢水吹。好簡唔中,都會半認真半開玩笑地,討論一下人生。

By the way,阿頭唔係真係我阿頭,佢絕對唔係我直屬上司。只不過你都唔好問我點解佢咁叫,人地叫你咪跟住叫架啦,岩唔岩先。呢個世界,個個咩都跟風架啦。

阿頭繼續大呼一口煙圈,望完一輪,就俾番個手機我,用睇穿晒人情世故既語氣話 :「無野既,呢D野,一雞死,一雞鳴。野雞燒不盡,北風吹又來。差佬做野,大家此消彼長,先唔會失業,個個有野做,香港經濟繁榮。無咩咁出奇。」

聽佢成日泰山崩於前而色不變咁既款,我亦無謂同佢拗,於是我話:「咁又係。不過香港其實成個地下經濟,有幾多係呢D咁既行業作出左貢獻都唔知。點解政府唔去估下?」

阿頭笑鳥,爆左一句Hi Auntie:「估你條命咩,點估呀?政府年年都估錯數啦,你仲叫佢去估呢D,唔通真係搵人逐個逐個竇咁起出黎,然後問人地一日生意幾多,收幾錢,開幾多張單咁呀?」

我一臉認真:「都未必完全唔可能,話唔定可以一下子提升個經濟容量,令到香港既國際地位提升架。好似最近意大利同英國已經係咁樣嘗試去估。」

阿頭操左一聲:「痴線,咁都有?D鬼佬有時諗野真係癲癲地。」

「都唔係架。娼妓呢個行業不論中西都已經有好多年歷史,恐怕上千年。其實係唔係完全合法化一直亦都好大爭議架啦。與其係偷偷摸摸,倒不如正大光明?認認真真咁樣去了解下呢個情況去到點,都未嘗唔係一件美事黎喎。」

阿頭一路聽,一路笑住搖頭,然後指住我:「講咁多野,你唔好話你自己想去了解埋一份?咪假正經啦你係度。」

我彈走枝煙,既然老吹,索性唔執輸,幾大都理直氣壯:「其實我真係覺得OK架喎,正常需要,正常解決,現買現賣,又有何不可呀!係呀,我不知幾想去試下添呀。聽D豬朋狗友講,服務不知幾好幾正。」

阿頭聽到眼珠都幾乎跌出黎:「你?你想叫雞?頂,唔好講笑啦。正正經經搵條女做女朋友去Hi唔好?係都要去俾錢?你對唔對得住養育你既父母親?」

車,咁我老豆後生有無叫過,我都唔知啦,咁講無咩好講。加上,敗家既又唔止一樣,如果計換智能電話,同女朋友去We we wet wet,咪一樣流血不止,果條數唔係數咩?但係阿頭始終係暴躁之人。學黃子華話齋,依家人人燥底,多一事不如少一事,於是我陪笑:

「都係既,我都係發表下意見啫。」

「OKOK,你好想叫雞呀嘛。」

我地食完煙,正想爬番入去李嘉誠個檔口做奴隸,阿頭竟然話鋒一轉,咁樣問我。

「下,都係講下啫。」我窒一窒,即時霸氣全失。我估唔到佢會突然玩認真。

但係阿頭呢個時候,竟然疊左我一疊膊頭:

「你想叫雞呀嘛,得。呢個星期日你得唔閒?」

我當然係不知所措啦。本來只係茶餘飯後既吹廢水話題,點知會突然間入到去變左實際操作層面架啫。

「我……我得閒呀。你,你唔係想……」

「心動不如馬上行動。你就咁睇,日日係度J,都唔係辦法。一於我地星期日,齊齊出征啦。」

「就星期日十點,港澳碼頭等。今鋪,包你食過番尋味。」

唔係呀嘩,講真架?阿頭我真係要跪拜你先得啦。

當然,接下黎幾日既工作日,我都完全集中唔到精神。客人想睇iPad,我就俾左iPhone;客人話要iPhone,我就幾乎想摸佢個胸……

天呀,星期日快D黎啦。

叔叔北行鳥!

 

(待續)

廣東人做雞有好多方法

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 138829
Date: 2016-07-24 05:22:04
Generated at: 2021-12-05 16:45:26
Permalink: https://www.vjmedia.com.hk/articles/2016/07/24/138829/廣東人做雞有好多方法(一)