唔好再Long D。一Long 就飛左佢。

(photo via cc Flickr user mrhayata)

(photo via cc Flickr user mrhayata)

 

作為過來人,我每次聽到LONG-D,都會講:

無用架。信我啦。不論你點樣努力,最後一定會分手架。

點解突然咁提,一方面係睇到一篇文。而另外一個原因,係我有一位女性朋友:律師,樣靚,千依百順,唔高,有身材,識煮送,就得人。點知突然個男朋友係外國返黎,就話要分手。喊到佢兩隻眼幾乎跌埋落海,連號召成個公園去玩POKEMON GO既人去搵,都搵唔到。佢問我,究竟死因係咩。我只能夠又再以過來人身份講多句:

因為LONG-D囉。

我唔係話完全無聽過LONG-D到最後可以共諧連理而且開花結果既例子。等於每期都有人中六合彩既,果個人唔係我渣嘛。失敗既例子實在太多。同埋如果本來關係係愈親密,愈係如膠似漆,呢段關係既死亡機會就愈大。如果你係都要問我點解,我只能夠講人本身就係貪心既動物,往往得到左既野,就要求永遠到手,然後再問彼此拎更多。無人會習慣LONG-D呢種咁虛無飄渺既形態,因為:

所謂天涯若比鄰既講法,係古人果陣唔知科技發達既美好幻想唶。自從有開始有得郵寄書信,到出現長途電話,有電郵,甚至視像,到依家基本上咩野MESSENGER都可以即時搵到果個人都好,因為LONG-D而鬧分手既,仍然每一日不斷發生。科技唔一定為每一個方面都帶來進步架。愛情就已經一定唔係。

有時樣野本身已經咁易碎的話,就係果下突然因為時差搵唔到大家,或者無得間唔中行下街,睇下戲,食下飯,就會有問題。突然情緒好低落,但搵唔到伴侶面對面發脾氣,或者攬下錫下,就會成件事氣氛唔同晒。重覆兩三次,本來一齊係香港無事,係外國反而變成好大裂痕。再加上偏偏身邊出現左一個唔知咩人又突然噓寒問暖,打入你既心坎。WELL。唔岩既人,碰上岩既時機,最後當然會出事。

我唔識點樣安慰律師小妹妹。只能夠輕輕講:慢慢等下啦,慢慢你就會無野。但下次真係唔好再LONG-D。一LONG就飛左佢。最方便而且多快好省。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 139081
Date: 2016-07-28 03:06:37
Generated at: 2021-11-27 17:20:29
Permalink: https://www.vjmedia.com.hk/articles/2016/07/28/139081/唔好再long-d。一long-就飛左佢。