下次大概可以？

Angevin 攝

我今日想講下愛情：我記得我好中意既一個填詞人（唔開名啦，費事搞到人搵唔到食）講過：愛一個人，要係在生既時候講。因為佢死左，你再愛，再講，都聽唔到既。

所以，錯失太易，愛需要及時。這個你我早已知。暗戀一個人，出聲啦。想追一個人，行動啦。佢唔要你？唔緊要，搵過第二件囉。心意佢唔肯收係一回事，但係唔好講到大義凜然，話下次再畀你啦。

下次下次，下次大概可以？冇架，呢首歌最尾果句係：「無下次。」

半年前，有人話，九月投返俾六號。對唔住，六號冇得選。而家睇個勢，係終身冇得選。因咩事，有六萬幾個投過俾六號既人，俾人終身剝奪政治權利呢？

半年前，有好多泛民支持者，話要守住關鍵一席，要顧全大局投七號。好了。現在六號永遠，我相信是永遠，都冇得選啦。你亦都唔需要找那條半年前說得漂亮的數。

愛一個人，要係佢在生既時候講，要係佢聽到，睇到既時候講。得罪講句，如果人都死左，你同我講下次投畀你？下次畀個官你做呀。

所以，今次投票，你要點投，我真係冇咩所謂，我亦都覺得你中意點就點。大個架啦，仲要人教你點投票？過去二十年，香港既名嘴都教大家：投畀泛民，香港有運。結果而家班九十後，二千後，如果佢聽到你講任何人叫佢地投畀泛民，我肯＿定佢地會出黎屌我老母。

你中意點投，真係你既事。我地呢班八十後頭既，回塘架啦。未來係你地既，我冇仔女（我得仔仔），冇下一代，教育點搞，都唔關我事。但如果你話畀我知，維持現狀，就一定死梗。

所以，我以後見到中意既人，我都會同佢講：「我愛你」。你唔肯收，你唔收，一件事。但我講左，我做左，我問心無愧。

作者：健吾

專欄作家、記者、編輯……商業電台節目《903國民教育》、《光明頂》主持，香港中文大學日本研究學系講師。著書超過40本。email：[email protected] ｜Facebook: facebook.com/kengopage ｜微博：t.sina.com.cn/kengowrites

閱讀後覺得好，請多多讚好及分享～：）