單機遊戲

 

 

Final Fantasy VII 封面

 

打機來說,我一定係而家嘅年輕人眼中嘅古董派,十幾廿年前那些經典單機遊戲才是我終生心水。

十幾年前Sega Saturn時代,我係友儕中極少數(十之一二都冇)堅持買正版遊戲嘅玩家,每日三十零蚊飯錢+零用,食個盎頭飯唔飲嘢六蚊之後全部儲起,一個月買一隻心水game玩,每隻嘅遊戲總時數動輒過百小時,那個時代的遊戲是美好的—-冇internet搵料未玩先破關,冇上午開game中午就全攻略全隱藏祕密解密這回事,SRW F 上下篇玩足一年,創造球會2玩兩年都未厭,Rockman X3 & X4 冇hints逐隻大佬白板Rockman瘋狂鍛鍊征服⋯⋯ 喺呢個難關-思考-研究-鍛鍊-過關嘅過程,I found myself. I am not a gamer but a fighter meanwhile.

早過十幾年前,我玩紅白機和SFC,家貧但冇拾薪為燭,打機用抄碟博士,那時嘅遊戲嘅好玩程度,我諗我日後老人癡呆都仲會記得:

Super Mario Bros咁多代(大慨也夠我送我來回地獄又折返人間)

Mario Kart(玩盡50cc-150cc+Mirror)

聖鬥士(永遠抄錯嘅續關日文)

龍珠(由SFC卡片版RPG打到超武鬥傳123)

FFV & VI(重玩N次,iOS版再被賺錢)

DQVI(正常玩爆幾玩到用模擬器學改game,但求見杜馬神殿隱藏大佬)

Simcity 1 & 2000(由起運動場改名無限金錢到千辛萬苦唔用祕技玩到收支平衡)

炸彈人1-5(兩兄妹逾千鋪對戰回憶+歡笑)

⋯⋯以上只是冰山一角,單機遊戲留給我太多回憶,其實嗰陣時嘅「遊戲」並不兒戲,而是成長的經驗,人格之鍊成,當你試過心無旁騖孜孜不倦咁鑽研一隻單機經典好game,嗰種認真去玩嘅精神和態度,夠你一生受用。

上述各種虛擬世界嘅奮鬥,Sorry,手機遊戲根本唔係呢回事,手遊鬥嘅係錢、時間、無限嘅運氣,為咗不斷引人落搭,手遊靠嘅係永無止境嘅關卡,只懂操控數據去增加難度的懶惰遊戲工程師、遊戲投入度近乎零,老實講無論轉珠還是塔防,其實和老虎機一味鳩㩒差無幾,手遊一貫冇連貫嘅遊戲背景和故事和空洞嘅遊戲角色設定,跟一隻完整的「遊戲」背道而馳,雖然我而家都有玩手遊,但呢種遊戲其實玩緊人,而唔係人享受遊戲。

 

 

《光輝歲月1988》類似單機中的AVG,有人生交叉點,冇播片冇CG,但它的結構才算是一隻有靈魂的遊戲:故事時間是平行時空八十年代香港,借懷舊說2016年香港的荒謬事,角色是耳熟能詳的電影人物二創+少量原創+時事人物,事件講這一代人反抗暴政的抗爭,整個遊戲疑幻疑真卻似身邊事,整個安排已經不錯——雖然比起以前好很好玩那些game已經遜色不少,但難得有香港人香港公司以遊戲保育呢個就來面目全非嘅「香港」,幾十蚊,絕對比交稅有意義得多。

 

後話:係,我係咁「以前」「以前」,我或許已經開始老餅了,但美好嘅事物唔單只純粹嗌句「好可惜」之後由佢死,弘揚good old days,教後世人明白香港曾經有幾好,以後都可以好返,只要我們有心,實乃應有之義,遊戲如是,香港如是。

 

作者:爽健

爽健
不求聞達於諸侯,只願笑傲賞江湖。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 139738
Date: 2016-08-05 05:31:52
Generated at: 2021-12-05 16:33:20
Permalink: https://www.vjmedia.com.hk/articles/2016/08/05/139738/單機遊戲