「南哥,我哋幾個場畀東星掃咗。」

 

陳浩南

 

標題句嘢係咩嚟?係《98古惑仔龍爭虎鬥》(即係第五集)嘅一句台詞。

呢句嘢又係點嚟?故事入面,身為洪興銅鑼灣揸fit人嘅陳浩南,被東星社嘅司徒浩南挑戰,彼宣言「一個銅鑼灣只有一個浩南,就係司徒浩南」;而且仲夾埋一個馬來西亞老千一齊呃陳浩南,要佢面又冇、錢又冇,一敗塗地。呢句台詞,就係陳浩南發現馬來西亞老千千咗佢之後,陳浩南收到手下包皮嘅一通電話:

「南哥,我哋幾個場畀東星掃咗。」

呢個時候,如果你係陳浩南,作為銅鑼灣嘅大佬,你會點答?

可能你會諗:「東星你真係當我死架喎,我陳浩南大大個人企嚮度都夠膽搞。」然後下一句就係「包皮,吹大雞,今晚就掃低司徒浩南,鏟平東星!」

冇錯架,今晚就掃低司徒浩南,當然冇錯,問題係,呢個時候陳浩南到底係點情況?

陳浩南因為畀老千搵笨,捲入咗馬來老千嘅商業詐騙案,仲可以行嚟行去,係因為李sir畀佢保釋;得力助手蕉皮,又橫死差館;仲有喎,陳浩南作為銅鑼灣揸fit人,一早就畀反黑睇到實,反黑組李sir講到明,銅鑼灣有咩事一定搵佢飲功夫茶。

而陳浩南面前,仲要解決幾個問題:首先佢畀人查緊單商業詐騙,搞唔掂唔通真係破產咩?衰咗,喺洪興點壓得住其他揸fit人?唔止喎,佢仲要諗辦法點樣可以唔使畀李sir搞又可以踢走司徒浩南喎!佢有大把嘢搞,係唔係要為啖氣掃幾掃東星個場,然後畀李sir盯死咩?到時銅鑼灣就真係得司徒浩南喇。

所以,陳浩南嘅回應係:「由得佢啦。」

後嚟,有睇套戲嘅人都知道,句「由得佢啦」只係唔再同司徒浩南有咩小衝突,反而係搭通天地線,搵晒所有可以幫手到嘅人幫手:同大頭仔練拳、搵十三妹過條索女畀何勇一晚七次、搵孖潤腸挖馬來老千啲臭史、搵大飛馬經鼓動記者、搵李sir準備拉人;再加埋佢同司徒浩南場「隻抽」,由得司徒浩南打,到佢自滿到要上擂台先連招收佢皮。

唔止自己全身而退,仲達到晒全部目的:商業詐騙案甩身、踢走司徒浩南;隨便喺蔣天養面前表現自己可以戒急用忍,係代理龍頭嘅最佳人物。

對比一下,當初吹雞掃咗東星場係易做,亦實掃到;但到底掃場有利,定係忍一時之氣有利啲呢?各位就自己諗啦。

 

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 140395
Date: 2016-08-14 19:47:35
Generated at: 2022-07-07 02:32:06
Permalink: https://www.vjmedia.com.hk/articles/2016/08/14/140395/「南哥,我哋幾個場畀東星掃咗。」