會計界選舉論壇:做大件餅?小心啃死

政治 / 最新文章綜覽

 

老實講,會計界選舉論壇一定無PwC爆煲咁好睇架啦,但諗深一層,有幾多機會可以睇到兩個老闆級嘅人扮晒斯文冷靜其實心底裡爆晒粗咁係鏡頭面前辯論拗交呢?

而且個節目,都有幾個亮點嘅:
例如17:50,陳弘毅表演左咩叫遊花園問非所答;
又例如27:09梁問陳「咁你愛唔愛國愛黨呢陳弘毅?」,話自己唔係中聯辦派出黎嘅陳弘毅想答「愛!」以示忠心,但又怕得失選民嘅表情又係世界級。
又又例如36:00左右主持問,曾鈺成曾俊華同林鄭三個選特首你會點揀,梁繼昌避而不答都係引人犯罪隔住個mon都想打鑊佢。

梁一味話自己做過啲咩邊一年做過乜邊一年做過物,而陳就好小學雞咁捉梁講錯野答錯問題但其實佢又成日講錯「業計界」,講到政綱,梁話自己有心有力有務實有方向,但個方向係乜?務咩實?嗯,唔清楚;而陳一味就話做大件餅,點做搵咩做又唔講,扮晒係伏筆咁,跟住梁講左四十五分鐘入面算係最有道理嘅一句:
「做大左件餅,邊個食?點分?會唔會有人啃死又有人餓死呢?」
或多或少講出左而家香港嘅情況,但點解明知情況係咁都無人去做啲野黎改善呢?

答案好簡單,因為佢地口中嘅「會計界」,其實只係講緊老闆,大概只有會計師樓嘅老闆,先係佢地口中嘅「業界從業員」,而做緊會計呢一行,唔好提未考牌個啲,相信有八成,都唔係佢兩位關心嘅一群,咩工時過長、咩不公平待遇根本就唔算係一個議題,換邊個上台,啲利益都係個幾條友分,簡單一句總結,Who fucking care?

呢樣野你知我知大家都知,所以成場辯論,我都只係等佢地講港獨議題,陳弘毅開宗明義講明反對港獨我地係中國人要愛國,而梁繼昌就話覺得港獨係無出路但當係學術討論無可不可。

他朝立會傾針對港獨嘅打壓方式時,佢地一個擺明反對,未選入去都估到佢會做啲咩,另一個表面話唔會反對,但到時埋牙要決定都係唔會知佢會點,所以九月四呢一票點投,我都唔知,可能都係整個「屌你老母,OT補水」印入去印滿張票算。

 

 

作者:阿樹

阿樹
一個正職Auditor兼職人類,用實際上不存在的私人時間說著或許早已發生在你我之間的故事。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 140739
Date: 2016-08-19 03:58:56
Generated at: 2020-08-15 10:51:37
Permalink: https://www.vjmedia.com.hk/articles/2016/08/19/140739/會計界選舉論壇:做大件餅?小心啃死