得罪講句,未有民族黨之前香港根本冇極右組織

 

左膠成日講咩「排外極右法西斯」,已經講到口臭變咗潮語。對不嬲以極右自居嘅筆者嚟講,只係感到可悲,因為香港根本冇政治組織嘅主張有資格稱得上係極右——直至香港民族黨陳浩天嘅出現。所以筆者今鋪唔做返次免費打手都對自己唔住。

陳浩天喺毛記電視個立法會選舉論壇上面嘅solo發言,可以話係最簡單易明嘅教材,解釋咩係極右。

 

只係一分鐘嘅演講,已經有齊極右嘅幾個重要元素:

 

1. 視族群衝突為癥結——「好不幸今日我愛嘅祖國出現咗好多中國人」

左翼總係將社會問題歸咎於資本主義下嘅階級壓迫;相反,右翼唔講階級,而講地域族群。香港嘅所有問題都係出於香港作為民族被中國人壓迫。係擺明簡化架啦,但呢個就係極右詮釋世界嘅論述。

 

2. 資本主義繁榮論述——「文明先進嘅國際金融中心,繁榮富裕」

以資本主義下嘅成就正面詮釋香港過去嘅繁榮,正正係肯定緊左翼最不齒嘅資本主義,仲要將資本主義同文明掛勾,左翼一定聽到打冷震。

 

3. 文明與落後二分——「我哋係文明世界嘅一員。好不幸今日我愛嘅祖國出現咗好多中國人」

香港以前好文明,但出現咗好多中國人之後就唔同咗。以香港嘅今昔暗示香港嘅文明同中國嘅落後,強調族群之間嘅文明程度差異,可謂同近來歐洲的反難民浪潮合流,大巴大巴咁摑多元文化主義到。

 

4. 以回復過去成就為目標——「一個應該繁榮安定、文明先進嘅國家」

右翼通常都講守護傳統,陳浩天就將香港過去幾十年資本主義下嘅文明同繁榮視為需要守護嘅傳統,社會右翼論述同經濟右翼論述就咁合流,要幾右有幾右。

 

5. 以驅除敵對族群為美好願景——「一齊努力,締造一個冇中國人嘅祖國」

上面咁多樣,都仲可以話只係右,未到極右,但最後一句簡直係極右嘅典範。美好嘅香港就係冇晒中國人嘅香港,簡單得嚟又激到盡,完全係族群衝突論述嘅極致。

 

左膠成日話本土派係極右民粹愚民,筆者就反而覺得民族黨嘅出現,絕對係起緊開拓香港人眼界、啟迪民智之效,起碼終於比香港人見識到,咩叫做有名有實嘅極右。

 

作者:quenthai

非中國籍華人毒男,極右本土後現代民粹鍵盤戰士,崇尚精英民主及自由意志女性主義,深信後現代分析可為精英主義所用,因為霸權本是平常事。Blog: http://quenthai.wordpress.com

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 141264
Date: 2016-08-26 14:15:57
Generated at: 2020-08-10 18:53:59
Permalink: https://www.vjmedia.com.hk/articles/2016/08/26/141264/得罪講句,未有民族黨之前香港根本冇極右組織