你係KOL 定只係玩緊單機KOF?

 

 

香港人求變,但不是廣義既變,只係狹義地變。

等於舊時約女食飯,佢突然話今日唔食日本菜,於是你即刻小心翼翼地揀間意大利餐廳。點知佢怒叱:我話唔食日本菜係唔想食壽司,其實仲可以食串燒架嘛。

哦。原來係咁。

今次選戰,見到好多人係網上都失望絕望。但普遍香港人就係咁,實現佢地最大心目中可行既民主。谷高左投票率,然後投番好多新面孔,就係依家選票反映到既主流思想。縱使佢地係網上俾人批判得好慘。

呢個亦令我繼續聯想到網上力量係社會發展同議政究竟仲有幾多空間。係未被開拓,定係一早已經係嚴重地誇大?就比如電視大戰,大家都以為普遍既香港人一早好厭惡無線,所以港視出黎大家都話撐,結果佢入唔到屋,D劇即刻無人睇了。到ViuTV 出黎,大家亦都熱烈地討論左一排,但早排D人又瘋傳城寨英雄好得了。大家又已經將本來電視霸權忘了個一乾二淨。係網上,仍然好似好有人氣既野,但其實係現實世界,卻唔係一定受到廣泛既垂青。俾網上彈得一文不值既野,係現實世界卻仍然大有生存空間。

人人都話紙媒在沒落,網媒在興起。今次不少既網上紅人,網上媒體,除左個別既互相傾軋之外,基本上都係保持不投左膠,不投泛民,而某幾個參選人既失言,係FB 係動軏有上千個SHARE。但即使如此,動搖唔到一向認為係口講空話既民主自決派大勝。佢地既得票甚至係駭人地高。另一方面,今次亦有幾個言論指出黎智英即將玩完,本土派既大勝。將會係蘋果同泛民既共業,劃上句號。殊不知,劃上句號既,唔係佢地,而係鄺神俊宇。佢做左票王。近五十萬票,呢個代表左咩野?代表係大部份人心目中,佢都人畜無害。人畜無害,就係大眾所期望既野。有地區經驗,寫到暢銷小說,滿頁標點,FINE。甚至可以話係香港人黎講係VERY NICE。WHY NOT GIVE A TRY? GOOD ENOUGH.

同其他地方網上勢力足以影響真實,香港呢個逆局現象實在值得我地深思。網媒,或者網上紅人OR SO-CALLED KOL,究竟真係KEY OPINION LEADER ,定只係KOF KEYBOARD FIGHTER?神駒可以有一萬人聽既電台,佢剷爆左膠,支持黃毓民,甚至連杜汶澤,李怡都有聽其節目。但點解天氣仍然不似預期,不足回天變天?

呢個值得深思。而更值得注意既係青年新政,今次係梁天琦既加持下,取得兩席。但受到好多人既質疑,年青人入到議會係咪可以勝任議會工作,完全未知。兩位都會受到嚴密既監察。坦白講,今次贏,完全係有運氣時份。我唔想好流於CLICHE 咁又講光環燒盡,但做得唔好的話,無說服力,亦都無人能夠幫唔到你。考驗,依家先開始。

至於香港既未來如何如何,太多人有講就不講了。但網上既力量點樣整合,翻出圍爐既高牆,係好值得研究既課題。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 141854
Date: 2016-09-06 05:50:02
Generated at: 2021-12-09 19:23:20
Permalink: https://www.vjmedia.com.hk/articles/2016/09/06/141854/你係kol-定只係玩緊單機kof?