每個人都有左膠之心

伊甸園

 

其實如果係天下大平,人格已經提升到最高既表現,的而且確人人左膠會係最烏托邦式既美好結果。大家都互助互愛,互相幫忙,大家一齊分享努力既成果,無秘密,坦承相對,唔係幾好咩?法國大革命果陣舉起既旗幟,唔係就係Liberté,Égalité,Fraternité咩?咪就係自由,平等,博愛呀。你今日講呢D,咪就係左膠囉。

呢樣野,中西古今皆然:桃花源記,大家都唔會陌生:「土地平曠,屋舍儼然。有良田美池桑竹之屬,阡陌交通,雞犬相聞。。。余人各復延至其家,皆出洒食。」三五識七都俾野你食你住喎?正到傻啦。大同與小康:「故人不獨親其親,不獨子其子;使老有所終,壯有所用,幼有所長,矜寡孤獨廢疾者皆有所養。男有分,女有歸。貨惡其棄於地也,不必藏於己;力惡其不出於身也,不必為己。是故謀閉而不興,盜竊亂賊而不作,故外戶而不閉。。。」咁好,連全民退保都唔駛搞,因為大家自動自覺養老人!

點解咁樣唔好呀?明明係終極體現喎。點解人類唔係向住呢個社會進發呀?點解人民公社大鑊飯唔WORK呀?其實倪匡係衛斯理度唔單止借外星人點出左一次呢個命題,就係人性太醜惡,太自私自利,有咩只係顧自己,只要有一個人想利用左膠既弱點,成件事就會土崩瓦解,於是就會產生不信任,背叛,用此為惡,剝削其他人。佢成日話:「其實一班人合力,可能犧牲一兩個,其他可以逃命。但問題係,無人肯做果一兩個。」離地,就接近天堂,但人類社會,貼地,卻係地獄。

物極必反,否極泰來。資本主義太盛,又產生共產主義,但共產主義催生極權,於是又番去資本主義,然後嘗試穩定社會,又產生福利主義,然後福利主義似乎又走唔落去,全世界依家負債累累,唔知道何來何從。左膠一路都想擁抱既係人既真善美,唔好打仗,世界和平,平心靜氣解決問題。但係面對窮兇極惡既無恥之徒或者政權,當然亦係無用武之地。

人類幾時先會大徹大悟,唔再係左右既鐘擺不斷來來回回浪費時間?唔知。我都答唔到你。我只係知道條路應該好遠,永遠睇唔到終點。同本身都唔覺得同你同一條船既人講同舟共濟,結果是人人皆懂的。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 141923
Date: 2016-09-07 17:56:31
Generated at: 2021-12-05 08:08:22
Permalink: https://www.vjmedia.com.hk/articles/2016/09/07/141923/每個人都有左膠之心