究竟老人選民是咪真係暴增20萬?

Posted by 老友memes on Monday, September 5, 2016

 

較早前,我SHARE過一個POST再三提醒老人選民數目大增,係同人口金字塔既轉變有關,而並非一般主流既想法純粹係「背後有力量促成新登記既老人家選民大增」,但亦有人認為,「立場新聞咁樣顯示個數據,並沒有錯」。一切都係在於讀者點INTERPRET。

的確。等於三一一地震之後好多報紙傳媒一樣都報導過香港輻射水平某日上升左幾倍,但其實係講緊零點零零幾既兩三倍,結果仍然不足以對人體有害;又例如同你講今年既人數又俾十年前上升左幾多幾多,銷售值高左幾多幾多,又無講你講當中既人口增長同埋通脹因素等等。無錯,一切都在於讀者點INTERPRET,有心人咪會識得考慮其他因素囉,但係更多人都係配合呢堆數,加個標題,然後諗都唔諗,LIKE+SHARE,將想誤導人既信息一傳十十傳百如同病毒一樣傳開。

依家轉發一個信息太快太輕易,亦都唔駛上身,唔需要陪上自己咩名譽,大不了咪又話咩呀人人都係咁做?或者HIDE POST刪POST了事。但無人意識到一個誤導,基於數字上既錯誤解讀,係可以為社會帶來幾大既禍害。BREXIT入面有幾個SPIN得好勁既新移民數據,到最後都發現其實係錯既。但係某程度上可能已經影響左最後公投既結果。因為果D看似公正不阿既數字,加深左好多人對於新移民既恐懼。

我成日都話,數據本身唔會食人。但問題好多人都對數有恐懼感,亦都敬而遠之,最好就有個人綜合左,用一幅圖表了事,易食易明。但中間就會變成有好多油水可以抽,有好多概念可以偷換。人人都話魔鬼在細節,但係好多人睇既野直頭連細節既原稿都睇唔到,換句話說,連魔鬼匿係邊都唔知。大家平時食緊既已經係轉載再轉載再轉載既三四五六手料。照食落肚,自然遺害甚劇。

ANYWAY,為拗而拗是無意思的,大家本身立足點都唔同。等於我依家發表言論堅持地球係方的,只係百分之九十九點九時間係圓,我都可以堅持己見落去,然後周圍屌人係你地唔識。都係千叮萬囑,睇數要萬分小心。不然係隨時重伏,然後仲賴番你:「我無咁講,你地自己INTERPRET架渣。我既數無錯。」

呢個係一個無賴既世代。

 

後話:

翻查番資料:「選舉事務處公布,2016年地方選區臨時選民登記冊有約377萬名選民,其中約17萬名為新登記選民,扣減約9萬5千名因離世和取消登記的選民,較去年增約7萬5千人。」咪將呢17萬名選民按年齡分布睇一次咪得。但我剩係知道點都唔係係老人家20萬囉。RITE?

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 141969
Date: 2016-09-08 13:04:00
Generated at: 2021-12-09 18:59:14
Permalink: https://www.vjmedia.com.hk/articles/2016/09/08/141969/究竟老人選民是咪真係暴增20萬?