睇全港總票數熱·普·城真係唔少票架……

政治 / 最新文章綜覽

熱血 陳雲 黃毓民

 

都成個星期,熱血公民嘅支持者仲講自己總票數……講下總票數都好~講囉~~(以下只講地區直選)

本土派及自稱本土派全港總得票
熱·普·城:154,176
AllinHK:81,420
眾志·列陣:173,122

就咁睇係唔係覺得其實熱·普·城真係好有人望呢?原來都係差眾志·列陣唔夠兩萬票,但人哋出幾條飛中幾條,熱·普·城就得一張名單入到;AllinHK仲過份,得八萬票拎兩席,真係離晒大譜。

 

不過,如果我哋加返「有幾多條飛」呢個因素入去……

本土派及自稱本土派全港總得票除以參選名單數(小數點後略去,下同)
熱·普·城:30,835
AllinHK:20,355
眾志·列陣:57,707

好啦,AllinHK真係好過份嘅,平均每條名單少一萬票都多熱·普·城一席,真係好仆街。但係睇下睇下,原來眾志·列陣平均係多熱普城足足萬七票架。咁人哋入三席佢哋入一席,都未嘗唔係冇道理架喎,以一部分熱血公民支持者嘅邏輯嚟睇。

 

反正計開,不如計埋啲泛民啦~

泛民主派及唔知係唔係泛民主派黨派全港總得票除以參選名單數
公民黨:41,577(207,885除5,得5席)
民主黨:39,975(199,876除5,得5席)
工黨:25,465(101,860除4,得1席)
人社聯盟:26,003(156,019除6,得2席)
新民主同盟:31,595(31,595除1,全部落選)

咁睇,AllinHK真係好過份好唔啱。我冇補充,建議梁頌恆及游蕙禎盡快前往布袋澳、滘西洲、大蛇灣、孔嶺、河上鄉(以上為新界東)、大角咀(以上為九龍西)向洪聖廟叩謝本土神明。

 

如無意外,除咗熱血公民支持者之外,應該冇咩人會好似我咁去分析總得票,因為去分析總得票真係比較無謂,除非香港好似澳門咁地區直選唔分區啦,或者好似德國咁一票投議員一票投政黨。

原因好簡單──香港嘅地區直選係有分選區;點解要分選區?就咁睇全港各地加埋邊一個黨派最多人支持咪得囉?

驟眼睇,咁真係好民主,全部人一齊投,最多票嗰黨就有最多席,好似好公平。但係,唔好唔記得,香港唔係每個區都有咁多人架……

呢個其實係民主政體入面嘅一個代表性嘅問題:因為唔同地區、唔同職業、唔同語言、唔同族群嘅人口都唔一樣,所以唔可以只睇人口數量就決定咩人可以得到民意授權;所以民主國家嘅議會,唔同地區嘅代表議席都唔會係百份之百反映地區喺國家入面嘅人口比例,只係一個約略嘅比例;更極端嘅情況,就係設計完全同人口比例無關嘅選舉制度輔助以人口比例決定議席嘅選舉制度。呢啲制度令到每個唔同地區、唔同職業、唔同語言、唔同族群嘅人口,手上嘅一票嘅代表性都唔同咗,表面上唔公平,其實就係要維護公平。

呢啲選舉制度,最為人熟悉嘅就係美國嘅參議院選舉同選舉人票制度,當然仲有香港同澳門嘅功能組別/間接選舉議員制度。前者有100席,美國每一個州,唔理人口多寡都有2個席位,用嚟表達各州對聯邦事務有同等嘅發言權,加州三千九百萬人同懷俄明州五十幾萬人嘅發言權係一致;咁樣設計就逼使從政者唔可以因為懷俄明州人口少就唔使理佢。

 

同樣,香港嘅功能組別議員,如果唔係中共私心破壞搞臭朵,其實都係維護唔同職業人士權利嘅選舉制度。因為醫生嘅人數一定少過工人,如果就咁睇人口決定邊個當選,一樣可以出現完全冇代表醫生意見嘅政治人物呢個情況。不過,香港嘅功能組別可以話係完全被中共扭曲咗嘅,因為1995年,香港係有「新九組」,九個功能組別嘅議席唔係好似今日大部分功能組別嘅議席咁,點幾百一千票就點完,而係要點幾萬票。當年唐英年選立法局進出口界議席,佢得票係24,997票(該界別當年總投票數係40,536票),對比當年有39,466人投票嘅九龍中選區,當選嘅廖成利都係得22,183票架乍。

不過由於中共對呢種功能組別非常忌憚,1997年之後自然就將新九組嘅選民定義,由從業人員改晒做公司票;新九組都成為中共成立臨時立法會破壞香港嘅契機。唐英年當年要24,997票先有嘅議席,九七年之後立法會選咗六屆,六屆都係自動當選嘅;又例如1995年,周梁淑怡同王國興大戰嘅批發及零售界議席,兩個加埋係有34,322票(周梁淑怡贏咗),2016年呢個新九組仲喺度,由邵家輝對區諾軒,兩個加埋先得3,521票,你話係因為班sales過咗二十年全部政治冷感晒,定係班sales已經冇得投?

香港嘅功能組別,其實唔係真係咁萬惡,只係畀中共破壞過之後,變成中共掠奪香港嘅工具。尤其是當一啲政治團體,佢主打嘅唔係貼地嘅民生問題,而係高層次嘅理念問題,一個選民基數足夠大嘅功能組別議區,會係佢哋發揮嘅舞台。不過可惜中出羊子2015年區議會選舉失敗,否則以熱·普·城同AllinHK嘅總得票數計,王國興唔會再係僅敗嗰個,而會係涂謹申(陳國強呢就……你話佢本土佢咪本土囉)。

講講下好似變咗為功能組別開脫咁。我想講嘅係,以現時香港選舉制度睇,關心地區直選全港總得票意義不大,但唔係冇。著眼點唔係4年次後下一屆,反而係依家。區議會要推到多啲人入去先,先有得選2020年超區;同時選民多嘅功能組別亦要有本土派冒起;必要時推新一輪政改,將新九組還原。當然,本文講喺議會度郁手,唔代表喺街頭唔做嘢啦。

 

最後都係一句話,司法覆核同選舉呈請,有排搞,唔知要搞到幾時;呢兩件事有眉目之前,議席分佈係唔會再有咩變化。與其繼續檢討,不如消化係呢個星期咁多檢討嘅成果,開始下一步啦。

 

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 142125
Date: 2016-09-11 04:54:36
Generated at: 2022-07-07 03:06:35
Permalink: https://www.vjmedia.com.hk/articles/2016/09/11/142125/睇全港總票數熱·普·城真係唔少票架