講本土,就要捧多D 香港出產既明星同埋模特兒

#哪裡只得我共你live2016

Posted by Angela Yuen 袁澧林 on Sunday, September 4, 2016

 

係依家好壞難分既世代,好多人都無時間去分辨咩係最好,有樣野可能忽然大受歡迎,賣到好貴,但並非一定係最好,不過至少佢有一定既質素,有可以短時間吸引到注意力,帶動到潮流,甚至引起到國際注意。因此,佢要有一定既包裝,亦有市場力量,有經濟因素,雖然佢未必係完全代表香港既文化,但至少首先令到世界,呢個係香港製造。我會將呢樣野,稱之為係面果一層,類似係次文化、流行文化既野。
 
呢一層亦並非一定好本土。例如韓國既KPOP,日本既動畫等等。較早前爆紅既江南風格,明顯唔係韓國既傳統歌謠,但佢令所有人知道韓國人,然後D人會開始瘋狂去發掘韓國既其他野。全世界都有卡通片同動畫出產,但就係偏偏日本既受歡迎,係東南亞以至世界滲透度極高。並唔係話套套動漫都好睇,當中亦有唔及水準之作,好多分析亦指出動漫市場係日本咁多年經濟衰退,亦有明日黃花既跡象,但至少到依家,佢仍然係競爭力好強既一個產業。
 
香港已經係世界知名既國際金融中心,但除左俾人知道好多人係度行黎行去,密質質既城市,炒樓炒到癲左,有個好無能既政府之外,香港仲有咩可以即時俾人談論?仲講緊英雄本色時代既發哥片?定係李小龍?音樂除左鄧麗君之外,王菲(返左大陸)?四大天王?仲有無後起之秀可以令大家知道好似PSY/少女時代,宋慧喬咁知道佢地黎自韓國既天王巨星?香港既奶茶做到全世界知名未?呢一層如果都無以為繼,我地仲點樣要求D蝦醬、魚乾獲得注意及拯救?
 
香港有好多本土野,又或者係已經睇落陳舊既事物,已經係歷史既巨輪下,成為滄海遺珠,接近被淘汰的情況,必須拯救,否則就會失傳。但果D野通常已經現時極低經濟效益。例如有粵港特色既手工業、漁農業,傳統既文化例如粵曲等等。一係就政府一直資助,俾錢接濟頂住佢地,一係就係為佢地推陳出新,換出新既價值,產生新既需求。如果香港人唔理,香港政府唔理,根本將寶當草,就要借助外國人之手。因為仆街講句,一經外國媒體報一報,香港先會如夢初醒。
 
THAT'S WHY第一層係咁重要,鍾意起次文化,如果有精彩既港劇港片港樂,D人會鍾意香港,自然就會愛屋及烏,開始去學廣東話,慢慢去發掘其他野(至少我覺得會係咁)。要做起香港既本土品牌,唔容易,但一定要有人有錢,肯踏出第一步。所以我同意文學都係,你寫到HARRY POTTER咁受歡迎,自然會有人同你翻譯,但要有人肯寫先囉。港產片亦都係一樣。所以VIUTV拍「唱出香港」,拍「活匠當下」係好好架。起碼佢兩層文化都有兼顧啦。
 
最後,都係果句,捧多D香港出產既明星同埋模特兒啦,岩架啦。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 142152
Date: 2016-09-11 15:17:39
Generated at: 2021-12-09 17:39:52
Permalink: https://www.vjmedia.com.hk/articles/2016/09/11/142152/講本土,就要捧多d-香港出產既明星同埋模特兒