你唔係以為Sammi 既Fans 真係入場聽佢唱歌呀嘛?

鄭秀文

 

成日都話:口同鼻拗,不如唔拗。

例如最新鮮滾熱辣既,莫過於係Sammi 演唱會失聲失場既問題。

如果係佢既死忠的話,根本就唔存在需要退票既問題,因為佢地一定會支持佢地既偶像去到最後一秒。入去現場聽演唱會,除左聽唱歌,最重要係真係親眼見到個人,甚至有得同佢近距離握手送花,呢D機會係千載難逢甚至係千金不換。又例如,唔通Twins 既Fans 真係全部耳膜有事咩?當然唔係。但佢地無野架,總之參加左,就係最高無上。換句話說,係佢地眼中,演唱會既金錢代價,不單係門票咁簡單,直頭係一張六合彩彩飛黎。你會唔會因為輸左六合彩而無比肉痛?唔會。所以就算Sammi 講唔到野都好,呢一切都唔重要,最緊要係見到佢,就係咁簡單。

但至於D唔係Sammi 死忠,一般只係想聽佢唱歌既普通市民,有不滿當然亦都係人情之常啦。等於你就算係天皇巨星都好,觀眾俾得起錢入得場甚至徙一晚時間,當然希望表演係對辦,就算你有咩原因唱唔到自己痛苦而聲淚俱下都好,佢地唔會好似死忠一樣付予無限同情,即刻歸類落去「情有可原」既區域。如果表演者辛苦之餘,觀眾又無足夠既視聽之娛,倒不如真係擇日再來,無謂搞到雙輸局面。再退一萬步講,你去買個名牌袋,一睇發現個面花左,唔通會話:無所謂啦都係LV黎既,我會照用無問題?當然唔會。

咁接下來既關鍵就係究竟去聽Sammi 演唱會既會係第一類人多,定係第二類人多呢?應該點樣處理先可以做到面面俱圓無任何負面影響呢?呢個就係公關技巧,呢個就係政治命題。但因為本欄最近刻意避談政治,所以解決辦法就掠過不提。純粹指出既係,如果大家本身著眼點都唔同的話,互屌根本到最後係唔會有任何美好既結果出到黎。LOL

不過如果單係相比番黎明上次既危機處理,似乎呀黎生成個執行力同速度都真係技勝一籌。火未著,先撲火,時間就係金科玉律,永遠都岩既。等到娛樂新聞去爆,你再去解,七情上面都無用,只係取悅到一部分人。The damage is already done。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 142615
Date: 2016-09-19 14:34:08
Generated at: 2021-10-21 06:30:42
Permalink: https://www.vjmedia.com.hk/articles/2016/09/19/142615/你唔係以為sammi-既fans-真係入場聽佢唱歌呀嘛?