馮煒光呢個人好值得研究

網絡大典圖片

網絡大典圖片

 

尋晚唔係訓得好著,係床上輾轉反側,當然唔係諗緊劏房啦。反而突然覺得馮煒光呢個人,係香港呢個光怪陸離既超現實社會,可能好值得研究。

尤其係當大眾普遍覺得香港無法出人頭地,收入同社會流動欠奉,前途一片灰暗果陣,佢係一個極好例子,說明只要將自己身體某部份割捨,連同做人既底線一同拋棄,一樣可以好似舊時中國歷史某D人咁執得重權,享盡榮華富貴。我講真架,舊時好多司禮監都有契仔幫佢建廟立祠,香火鼎盛架,唔係野少。再講,以前淨身,有生命危險;依家其實都係精神上去勢。失敗左最多拎綜援,輸不了。

睇番過往報導,馮煒光九六年開始創立公關公司,已經賺唔少錢,D客包括咩?就係新創建集團,以及強國客包括中遠國際、中遠太平洋、光大集團等等。當初呢D人脈,係點得番黎?有趣既係佢係一直維持住自己區議員既身份直至進入政府為止,然後先結束呢檔生意。報導又話,他係零一年及一一年已經買到兩個海怡半島單位。而且係果陣已經有一架保時捷同寶馬,即係佢未做自宮發言人之前,身家已經超過千萬保守估計。

嘩,照咁依家一萬蚊一日,做幾年咩新聞專員先賺千萬,雖然好多高登仔已經葡萄都葡萄唔到,但仍然真係委屈左佢,大材小用喎。話鋒一轉,香港人咪有高學歷情意結既。佢個華中師範大學歷史文化學院博士研究,唔知讀成點?據講佢當初預期係一七年可以發表論文。老實講,觀乎往績,佢寫既專欄十篇有九篇都錯,唔係歪曲事實就係數據不符,我真係有D期待佢篇論文會講咩。如果畢到業,D閱卷員又會有咩評價。諗起都扯扯地。

佢既散文集唔結集成書供後世參詳,亦係徙左。點解無出版商搵佢接洽,問佢黎緊既香港書展檔期?通常美國D政治猛人出左白宮,一樣出書立說,周圍演講掘金。係香港呢個功利社會,警察都仲有年青人仆去考既新生代,佢一定有好大市場。怪獸家長一向多年都係「出人頭地」為先,「仁義道德」在後。一個人將自己既舌頭苦練到滿布利苔,然後名成利就,可能最後屯富近億,又有女左擁右抱,如此葵花派武功絕學,不應失傳。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 142888
Date: 2016-09-26 13:45:48
Generated at: 2021-10-21 06:35:30
Permalink: https://www.vjmedia.com.hk/articles/2016/09/26/142888/馮煒光呢個人好值得研究