國泰可唔可以做好晒自己本份先搞無謂野?

 

見單新聞話國泰有無新動作,想將經濟客位一行由九個變成十個,我一睇到真係笑左。

有坐慣下飛機既相信都知道國泰既服務係呢幾年係跌WATT跌得幾緊要,呢個上網睇人既評論已經太多我都唔想再花時間多講。而且經濟客位長途機不嬲都已經係惡夢,依家仲話要跟大潮流進一步壓縮空間增加機位,我有少少懷疑國泰航空根本同機管局起第三條跑道一樣無認清問題,純粹覺得只要增加左位,就可以多D營運收益。

航運問題係呢幾年跌入黑暗時代,主要都係因為貿易係金融海嘯之後一蹶不振,而且市場愈黎愈多廉航公司令到競爭愈黎愈激烈。國泰貴為世界上前列曾經飲譽國際既航空公司,不單止無努力改善服務質素,反而反其道而行之,成日想對員工福利埋手,搞到工會要搞罷工為止,依家又更改經濟客位既SIZE黎度縮,行為小家之至。你估真係年年SPONSOR花車巡遊就會幫到手咩。

難道增加個SUPPLY就可以影響到DEMAND??唔通我開間茶餐廳,如果係位都未坐滿,加位就會多左生意咩,到頭來係咪都係得個桔。再者,又唔諗下自己堂堂一間航空公司,竟然可以因為炒期油(美其名曰對沖)既情況下錄得巨大虧損,甚至足以OFFSET基本業務帶來既收益。我無COVER其他航空公司唔知係咪咁,但就咁聽落去,都足夠聳人聽聞。如果你努力做好晒自己本份都唔掂,加機位就情有可原唶。依家幾單負面新聞落黎,國泰既聲譽愈黎愈差,已經係不爭既事實。你仲搵D咁既搞,仲唔係趕客?

管理層既思維,有時都真係好難明。不過講番股價,11年以黎都接近係橫行長線完全無啖好食得個賺息,又唔係高息過人。呢D咁既股執到又係喊三聲。下次有機會再飛,我都會諗下第間航空公司。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 143195
Date: 2016-10-03 14:37:58
Generated at: 2021-10-21 07:33:41
Permalink: https://www.vjmedia.com.hk/articles/2016/10/03/143195/國泰可唔可以做好晒自己本份先搞無謂野?