【真。男人浪漫】自己鋪地板!

(photo via cc Flickr user Decorative Concrete King)

(photo via cc Flickr user Decorative Concrete King)

 

唔知有冇朋友會自己鋪地板,今次鋪時所用嘅技巧喺到寫一次,希望有人可以指正,亦等有意鋪無縫地板嘅朋友參考一下。

第一次自己鋪無縫地板嚟講,我係打boss 的,因為我鋪村屋,環境濕度比較高,而且啲牆身係歪的,換而言之間房係梯型,所以我要做嘅野又多左。

首先,濕度高地方/冇鋪地板嘅水泥地一定要先鋪膠膜,但問題係好多木地板鋪都唔再賣,咁可以點呢?有人會用包書膠代替,但我認為係廢時失事的,你可以去賣膠袋嘅鋪頭買膠墊,好大卷,幾間屋都得。而鋪地專用膠膜可以喺地毯鋪買到。而鋪膜時,記得包高少少上牆身保護埋地腳線(如果你將會裝埋。),最好鋪之前痴少少雙面膠紙喺地下先,防止塊膜郁嚟郁去。我買唔到膠膜個時俾人水左去買瀝青紙,其實唔係唔得,都係防潮,但好難處理,又拱又多粉跌出嚟又難cut,DIY 廢青無謂咁樣越級挑戰。

鋪完膠膜後理應係鋪隔音棉(其實係膠)的。好多人會鋪白色個隻珍珠棉,但我會強烈推介以鋁棉(一邊鋁一邊藍色膠棉)代替。前者五毫子呎,後者三蚊呎,貴好多,但防水性亦相對比較高,最重要係個鋁面有一格格印左喺度,質地又硬一點,容易切割,對我呢種冇經驗非專業嘅廢青嚟講係更容易割出合適尺寸的。都係啦,用雙面膠固定位置。

鋪地板記得要順住光嘅方向,或者長個邊牆鋪。記得鋪個時地板同牆身要留最少一厘米空間等佢熱脹冷縮,唔係熱/濕個時就會拱/爆,到時喊都無謂。而鋪之前要度下短個邊牆,睇下最後條空隙有冇十厘米(唔包埋預留嘅一厘米空隙),如果有就到時鋸地板照拼,但如果冇,就拎走最後個一塊地板,再度現時地板同牆先之間嘅距離(唔包埋預留嘅一厘米空隙),再除二,照呢個長度打直鋸啲無縫地板並用喺首行及尾行。

拼個時記得頭尾都要推實落去上一行地板到,唔係歪左嘅話就裝唔到旁邊同之後一行嘅地板了。鋪到行尾時,拎一塊地板轉180 度再用直角呎畫線後鋸。如果有電動工具會好做好多,而手鋸…… (我咪係囉)記得買把靚木工鋸,因為呢啲地板真係好撚硬,鋸到手軟都未鋸完……

其實自己鋪嘅難度唔高(5.5/10),但就真係麻煩(7.5/10),如果你唔係屎忽痕/有興趣自己DIY 我就勸你唔好慳搵人鋪呢筆錢。因為當你自己鋪個時,你先會發覺,有啲錢,真係抵俾的。不過,你睇得我呢篇文,就已經少左好撚多麻煩,唔洗周圍撲搵賣膠膜嘅鋪頭,又知道多點技巧了。

 

作者:亂臣賊子

亂臣賊子

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 143301
Date: 2016-10-06 05:09:08
Generated at: 2020-04-05 06:06:48
Permalink: https://www.vjmedia.com.hk/articles/2016/10/06/143301/【真。男人浪漫】自己鋪地板!