如果姑姑同過兒係21世紀現實世界既人物?

 

小龍女

 

神雕俠侶成書係香港既六十年代,但係想法到今時今日,仍然適用(五十年不變)。其實入面亦不外乎講 #愛就係選擇,#選擇就係捨棄。我唔係講玩,係真的。如果唔係咩叫問世間情是何物,直教生死相許?並唔係老土野黎,就係話我愛你愛到連自己條命都可以唔要。當然呢個係小說啦,現實無咩人做到啦,但呢個當然就愛既最高境界。無死讀書既都不難看出,其實古墓派掌門,係個終極港女,佢自己得唔到愛不特止,仲要求佢既女弟子都同佢癲埋一份,要一直匿埋係活死人墓,唯一可以破戒既方法,就係有男人肯為佢地而死。心諗WTF?「我要將你拯救」真係往往童話故事先有。呢個第一點。

第二點,當然係魯迅既禮教吃人。明明楊過同小龍女本身可以幾百字就完左個故仔,點解搞左咁多離離合合?就係因為同依家個世界一樣,旁人議論紛紛,有人搞局。不止有一次有金學人士指出,武俠世界就係現實世界,武林就係權力,權力就係政治。於是所有搞政治既人,就算本身光明磊落,為正義(WHATEVER YOU CALL IT)而戰,都少不免會耍下手段,好讓自己既門派(政黨)得益。堂堂武林高手,當然要言行舉止合乎規範(WHATEVER YOU DEFINE IT),講句扑野就梗係唔得(根據黃蓉姨講,叫苟且之事)。再加上楊過本身個老豆就一早俾人標籤左係賣國賊,佢被定落黎既罪,仲要由個仔黎去繼承,難怪人都癲。

所以,再仔細D睇,小龍女雖然仙氣爆發,武功蓋世,用情專一,白衣一襲走足出場尤如仙女下凡,但其實係今日既香港,佢一樣會受唔住超大壓力,隨時自刎身亡。先簡短回顧佢既前生:孤兒,俾一班變態港女老太婆所救,被灌輸各種扭曲思想,然後收左徒弟,相愛,下山,被姦,[被重傷,(以為)被拋棄]XN。最後都係自盡既,仲要叫人等佢十六年。大佬普選雖然都唔止等左咁耐,但時間已經夠打幾次世界大戰。我相信金庸唔係想配合市場需要,大玩BBQ情節,大團圓結局,小龍女本來就係一定要死。

(補注:但結果佢係犧牲左全書性格最好最良善既角色:郭襄,慘收好人卡。結果又造就另一個終極港女門派係下一集倚天再遺害人間。)

如果尹志平(係要用舊版名吹咩)當日污辱(WOW SO OLD SCHOOL)呀小龍女果陣有拍片,放左上網,佢一定俾人定義係雞係公廁,俾高登仔鬧到痴線(唔係處,唔得架)。然後師生戀,又係罪犯天條。楊過不斷開後宮,佢都仲不離不棄,更加會俾某D人覺得佢搞到自己CHEAP晒。更加唔好講佢不斷衝擊武林入面既議事規則,終於就被定義為妖女又要俾九大高手圍攻。所以睇金庸,唔係死讀書咁睇架。

只係你學我咁睇完,你會更憎呢個世界:其實無進步過。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 143352
Date: 2016-10-06 20:31:59
Generated at: 2021-12-05 07:36:03
Permalink: https://www.vjmedia.com.hk/articles/2016/10/06/143352/如果姑姑同過兒係21世紀現實世界既人物?