睇《你的名字》之前必須知道的十件有關新海誠的事

 

新海誠大熱作品《你的名字》將於11。11上畫。

人人都知道佢既驚為天人之作《秒速五厘米》,但其實除此之外,仲有好多關於佢既野,不少都仲未係咁多香港人知。距離電影上映仲有一個月到,不如輕輕揀十件講,到時大家唔驚約女睇戲,都完全會無晒話題:

一。新海誠並唔係美術出身,卻係文學系出身,亦強調自己深受村上春樹影響。佢既畫功亦都無任何老師去教,可以話係無師自通。

二。新海誠早係動畫界已經打響名堂,赫赫有名,佢令人驚豔既動畫電影作品好多,而第一個較為人所熟悉既應該係「星之聲」,2002年,即係已經十四年前!

三。新海誠上一套作品係2013年既「言葉之庭」。計埋「雲之彼端,約定之地方」(2004),「秒速五厘米」(2007),「追逐繁星的孩子」(2011),如果咁樣表面睇,新海誠其實都唔算係太多產。但勸大家不妨都煲一煲先。

四。必須要知道既係,一開始新海誠初出道既動畫電影,導演,劇本,演出,作畫,美術,編輯等等幾乎由佢自己一個人全部包辦!呢種全能動畫電影監督,堪稱日本動畫近代史上絕無僅有。唔怪得有人已經開始將佢同宮崎駿相提並論。

五。而當初使用作畫既,亦不過係普通既個人電腦同埋Photoshop 同 Aftereffect 呢D唔係會特別令人驚訝既普通軟件。「星之聲」好似用左七個月時間整,雖然全劇都係半個鐘度,但你都咪話唔痴線。

六。新海誠其中一個動畫既特色係對畫面景像既掌握,然後做出最唯美既一面同埋將細節巨細無遺一一呈現,而且光影控制亦係一絕。因此佢又被稱為Wallpaper 誠,壁紙誠。係訪問之中,佢曾經話過黃昏佢係覺得最美的。唔怪得成日係佢既作品都會出現黃昏既畫面。

七,新海誠曾經透露,雖然秒速五厘米係大熱之作,但作品故事仍然有好多不足既地方。相反,佢就覺得另一套由輕小說改編既神番「龍與虎」,係接近完美既一套作品。亦十分喜歡釘宮理惠聲演既角色逢坂大河。

八,新海誠前期亦曾經有同成人遊戲生產商合作,負責片頭動畫既製作。但大家唔好誤會,入面係無十八禁內容。其中較出名既有Ef 系列,大家只要一搵番黎睇就見到新海誠果種作畫風格係晒入面。近期則有幫企業製作電視廣告,例如大成建設等。

九,新海誠既電影雖然好多男女主角既愛情都無法開花結果,受盡青春愛情既煎熬,但其實佢已經結婚生子。不過據聞初戀當然係初中時既同班同學好似仲單戀左人地六年咁添,所以都唔係話往後作品既投射完全無作者佢自己係入面既。LOL

十,新海誠係貓奴,自己亦有養貓。曾經有一隻貓甚至以「雲之彼端,約定之地方」既女主角名黎命名。

新海誠絕對係傳奇人物。今次新戲上演,係日本已經大破動畫票房紀錄,一定會捲起全球熱潮。我就無論幾忙,都必然會去睇套戲。大家都真係萬勿錯過。無女都一個人照去啦。LOL

(後補:有朋友建議我講埋新海誠其實係日本大型建築企業新津組社長之子(http://www.niitsu-gumi.co.jp/)。本名新津誠。哈哈。不靠父幹,自己硬闖,係咪真係咁堅呀誠哥~~)

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 143576
Date: 2016-10-11 05:57:31
Generated at: 2021-10-21 07:34:59
Permalink: https://www.vjmedia.com.hk/articles/2016/10/11/143576/睇《你的名字》之前必須知道的十件有關新海誠的