【輔仁獨家優惠】燈塔名師教你一夜致富(合法渠道)

(photo via cc Flickr user aotaro)

(photo via cc Flickr user aotaro)

 

如果搵得錢夠多就可以做傑青的話,我身邊大把FRD都做得。但係數最短時間入面以最兇險最粉身碎骨既方式賺最多既錢既人,恐怕係非阿祖(假名)莫屬。

阿祖同我果陣係某一間金融機構度一齊捱過下騾仔,即係又係食無定時,就算食都係係個中環廣場之類地方個噴泉邊爬個外賣飯盒果種。有一日阿祖同我講,佢話佢唔想再過呢D俾人壓榨既生活喇。佢決定博一鋪。時值金融海嘯岩岩開始,個市一輪急跌之後,未係好跌得落。佢就同我講佢既發達大計係點:

「我已經將我可以申請到既信用卡,果十張八張,連埋女朋友同埋自己屋企果度加埋,將全部卡儲起晒,一次過問銀行同我全部OVERDRAFT,果度有百幾二百個。」

「下,你想點呀。」單係聽呢一點,就已經得人驚。「然後我就會拎晒呢筆錢黎,粗粗地博一鋪,買晒落去一隻石油既PUT度。石油價已經好高,家上依家個勢,一定會急跌。到時我就可以一次過賺一大筆,我唔會再做野,即刻上車買樓同女朋友結婚。」

其實阿祖個背景個香港百幾萬既年青人一樣咁老土,又係有個女朋友拍左拖好耐但係因為無樓或者唔夠錢俾對面屋企人睇唔起之類。但咁樣做,真係風險太高,一睇錯邊,呢世真係玩完,係完全地玩完。「阿祖,我知你等錢駛,但係咁樣博唔過喎。值唔得呀。」我又話,「同埋最近GOLDMAN先REVISE UP個油既FORECAST,係就話離晒譜,但你小心中左大鱷既伏呀。不如再冷靜D先。」注:果陣既油價係話估緊會衝上二百美元一桶既。

但係其實阿祖係無諗住得到我既同意定係點,佢只不過都係見同我有番咁上下好傾,所以同我講咁解。而佢亦知道我根本無可能會同佢癲。但係呢件真人真事,講到最後,結果係人盡皆知的:油價不久就真係進入熊市急跌了,而真係訓晒身家(連埋佢女友同屋企人既身家)既阿祖,當然即時暴發。果然阿祖就無再返工,亦都無再同我聯絡,但呢件事佢既唔少朋友都知,大家到近期講到佢,依然津津樂道。。。

賭大細既野,再加埋槓桿入去,你好彩咪掂,唔好彩咪橫屍街頭囉。我估佢依家都係住晒洋樓養晒番狗既。如果甚麼五年供斷層樓已經傑青,阿祖一定係永遠榮譽添啦。就等於果陣毒果賣樓價飛升,好多AGENT賺百萬年佣,佢地都有機會入圍架。香港地,不嬲都最讚揚呢D事跡,RIGHT?

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 143583
Date: 2016-10-11 14:52:26
Generated at: 2021-10-21 07:20:04
Permalink: https://www.vjmedia.com.hk/articles/2016/10/11/143583/【輔仁獨家優惠】燈塔名師教你一夜致富(合法渠