細數歷任立法會主席……啲票

政治 / 最新文章綜覽
(Derek Chi Wai Yung 攝)

(Derek Chi Wai Yung 攝)

 

香港自從1993年唔再由總督兼任立法局主席之後,至2016年10月11日止有四位立法局(會)主席。

第一位係施偉賢爵士,1980年起任立法局議員,於1993年起擔任立法局主席;但本身1991年起香港總督作為立法局主席只係禮節上嘅角色(類似香港總督擔任各大學校監咁,具有實權,但慣例唔會運用),所以會委任一位立法局副主席實際處理立法局事務,呢一位副主席就係施偉賢。1993年總督唔再兼任立法局主席,副主席之位廢除,但當時議員互選之下仍由施偉賢任立法局主席。當時立法局選舉制度每屆都會改一次,多少仍係過渡性質;立法局會期又已經過咗一半,換主席亦無謂;所以施偉賢爵士做「無票主席」算係情有可原。

第二位係黃宏發,自1985年香港有立法局間接選舉開始就任議員;1988年選舉仍獲連任;1991年開始地區直選,採雙議席雙票制,於新界東以次名當選;1995年加入新九組以及取消委任議員後,仍於新界東南直選當選,同年任立法局主席;因北京不忿彭督循序漸進於香港開展民主化改革預備去殖民化,1995年當選嘅立法局議員皆不得留任至1997年7月1日之後。故此,翌年,香港立法局由黃主席宣佈無限期休會。

第三位係范徐麗泰,自1983年起就係立法局委任議員,直至1992年,因不滿彭督開展非殖民化政制改革,暫時退出政壇間一直為委任議員;其後轉投親共陣營,1997年起任臨時立法會主席,廢除彭督任內一啲非殖民化舉措;1998、2000年兩次立法會選舉,由於已經冇得再委任,所以就參選選舉委員會議席,兩次均獲連任,亦能夠續任主席。2004年選舉委員會議席取消,范徐麗泰出選港島區地區直選,以六萬九千幾票當選,續任立法會主席四年,至2007年宣佈不再尋求連任,2008年於大陸當選人大常委,當年結束議員任期之後,一直於每次特首選舉時突然冒出又潛水,以示犯婦人尚未抄斬。

第四位係曾鈺成,同前三位好唔同。九七前,佢有參選,但未贏過。1997年搞臨時立法會,當然唔會冇佢份,亦冇得冇佢份;但之後佢就一直都係地區直選當選,冇好似范太咁要靠個類功能組別嚟坐實個位先去地區直選。

就咁睇,四位立法局(會)主席,似乎係得黃宏發同曾鈺成兩位,喺就任主席嘅任期內完全係地區直選產生嘅議員;而一直靠一個冇必要存在嘅類功能組別選舉產生嗰個,反而仲因為做主席唔使表態,由唔敢直選做到去直選都當選添~

既然係咁,即係直選議員任主席未成慣例、功能組別議員長期執主席位仲冇人反對;第一位真正意義上嘅主席甚至係委任議員。今時今日,有人自動當選都無恥參選立法會主席,又有幾出奇呢?

 

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 143610
Date: 2016-10-11 21:27:17
Generated at: 2022-07-06 08:14:56
Permalink: https://www.vjmedia.com.hk/articles/2016/10/11/143610/細數歷任立法會主席啲票