移民唔係想像中咁正

(photo via cc Flickr user Jacob Norlund)

(photo via cc Flickr user Jacob Norlund)

 

同好多香港人一樣,筆者都好唔鍾意香港今時今日嘅環境。香港有幾衰,唔使我多講。不過,如果你真係諗住透過移民來「避開」香港社會嘅問題,作為過來人,在下勸你都係要再三考慮。

簡單來講,你覺得一個地方好,可能係唔了解一個地方,或者從遊客角度去睇一個地方。外國遊客可能會覺得香港好,因為交通方便、食物又平又好食等等。因為政治問題或高樓價影響唔到佢地,所以佢地嘅眼中就只有香港硬件配套。同樣,香港人出外旅行,或者會覺得某個地方好,所以想喺嗰度定居,但呢個可能只係假象,因為去旅行唔使長時間面對當地政經問題,就算語言不通都只係一陣。

好,入正題⋯⋯究竟有乜因素令移民呢件事唔係想像中咁爽?

首先,係語言問題。喺香港,稍為識英文就可以好似高人一等,特別係ABC港女。喺英語國家,識英文根本唔係一回事,當地人唔會因為你精通英文而份外欣賞你。我地用廣東話日常溝通,係唔需過份使用大腦思考應該點講。但要用到非母語同人地溝通,下下都要諗點講,個腦會好攰,人地亦覺得好怪。仲有一樣野,外國人講英文好快,唔會因為你係移民而就你。

其次係搵工問題。香港主流行業係服務性行業,但外國未必係,所以移民後未必搵到對口工作。以美國為例,工程先係最有錢途嘅行業。就算有對口工作,仲有語言問題要面對(係呀,又係語言問題)。喺一間公司工作,要同同事溝通,層次已超越平時吹水。好簡單,叫你用英文向內行人講解你喺公司做緊乜,你講唔講得出?90年代後期,有好多香港人回流,其中一個原因係搵唔到工。佢地未必無技能,可能係英文唔好,所以搵唔到工。當然啦,如果你有錢到下半世無憂,連工都唔使做,就當呢點無到啦。

最後係適應新環境。喺香港,交通非常方便,鋪頭又開得夜。但喺外國,特別係小鎮,一個鐘先得一班車、鋪頭又一早收檔。你夜晚肚餓想落街食宵夜?一係你揸車去幾公里外嘅快餐店,一係你一早買定,再唔係就食穀種啦。仲有,香港係全世界最多好野食嘅地方(呢樣真係無得否認),喺外國無咁多野食。除咗硬件配套,仲有文化差異。唔好睇少佢⋯⋯我地開玩笑,某程度上係基於主流默契,例如有好多香港人笑人地係基佬,係因為部分人覺得同性戀唔正常。但喺外國,同性戀係正常不過嘅事,用來開玩笑係禁忌。如果下下開玩笑都要諗過度過,會好無癮。

至於政治、經濟等問題,有機會再講。喺美國住咗N年嘅筆者表示,美國政治唔好得去邊,那怕係有民主選舉。

成篇文想講嘅係,移民係一場高風險賭博。一個唔好彩,分分鐘衰過留喺「祖國」。好簡單一個測試,喺你諗住移民前,先練好當地語言。你過到呢關先計劃移民都未遲。

 

作者:90後賣國賊

90後賣國賊
一位香港土生土長90後,定居於美國。住在香港超過20年,歷盡社會制度荒謬,抗爭無果,於是叛國移民。移民後發現,類似荒謬事情只是以不同形式重演。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 143662
Date: 2016-10-13 20:40:02
Generated at: 2019-11-12 19:10:48
Permalink: https://www.vjmedia.com.hk/articles/2016/10/13/143662/移民唔係想像中咁正