浮誇既婚禮,梗係由求婚開始啦

(photo via cc Flickr user Reeknees)

(photo via cc Flickr user Reeknees)

 

結婚既第一步,當然係求婚。求婚已經係最簡單既一環,但有時都有亂子。

有心既男仔,都會為果日挖空心思,透支佢未來廿年腦力。本來求婚既野,就係非常之個人,兩小口子之間既事,只要花多少少心思,女方覺得甜蜜溫馨既,多數都會願意,話駛幾多錢,真係次要,豐儉由人。但當然大前提係在於,你女朋友班FRIEND唔係又最近岩岩有人PROPOSE完(係,依家要用英文,講求婚已經係低左一個檔次架啦RIGHT?)。一有一大堆比較,就算口裡話唔介意,心裡又開始多一D盤算,隨時令你既計劃,又製造多一重既考慮。

通常係果D唔知做乜事既大同聚會,或者HIGH TEA時間,就會突然有個女仔隻手不斷抽筋,係咁撥頭髮,而且一分鐘拎起隻茶杯成十幾次。如果聚會當日室內有落地大玻璃,陽光普照就更加理想,佢一定會坐係最曬果一個位,點解?因為,佢要用手裡果隻SO-CALLED「小玩意」(魔戒就魔戒啦,叫小玩意真係造作到嘔囉唔該),以鑽石既2.149 反射比率去反覆顏射你地班友,幾百連發。再之後,終於『計劃通り』,有條友開始呼天搶地,失聲大叫:

「NICOLE,你男朋友PROPOSE左牙???」

搞咁耐,加左咁多茶都未肯走,就係為左呢一句。

跟住,話題就會好似美國總統大選辯論咁樣以回合計展開。NICOLE首先會講呢隻本來係TIFFANY,不過岩岩最想要既復古款式無貨,WELL,但係其實CARTIER都唔係貴好多,岩岩好1卡多少少,十六萬『唶』(尾音要拉長)。個SPEC分別係『E,VS1,三個EX』,下,砌機我就識唶。唔知D代碼講咩?唔緊要,時機未到。去到果期你就發現自己接近可以去GIA度考牌架啦,唔駛心急既。簡單講,四個C,就係C-C-C-C,全部都係元素表入面既CARBON是也。講完。

『HOLY SHIT!咁你男友係點求婚架。』阿MARY定SUSAN,一邊仲咬緊馬卡窿,但係都顧唔到儀態要即刻問,梗係啦,咁重要。『其實都無咩野』,都係去去下紐西蘭旅行,佢話要跳降傘,我係地上面睇,然後佢同其他人拉開個橫額,寫住WILL U MARRY ME『渣嘛』。之後再入去間小屋,竟然點滿晒蠟燭同埋放滿鮮花,唔係一束束,係成個周圍鋪滿晒。。。佢再跪落黎,同我講,叫我嫁俾佢『喎』,我都係『應承住先啦』~~報告完畢,然後所有人又要不停咁OMG~~

究竟呢D叫唔叫曬命?是咪合法?見仁見智啦。可唔可以向奧比斯投訴?而你女朋友如果聽到,係咪一笑置之,定係已經好似INCEPTION套戲咁,放左隻一直轉既爆旋陀螺係夾萬,埋下以後既禍根?真係答你唔到。但之能夠奉勸一句,呢個世界度度都有想觸發軍備競賽既仆街,佢地既目的,就係挑起世界大亂。

 

【港式婚禮新郎喊苦喊忽自己知】

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 144081
Date: 2016-10-18 14:57:12
Generated at: 2021-12-09 18:42:09
Permalink: https://www.vjmedia.com.hk/articles/2016/10/18/144081/浮誇既婚禮,梗係由求婚開始啦