奎明效應:打風不成三日雨?

(photo via cc Flickr user Tridentz)

(photo via cc Flickr user Tridentz)

 

大家可能今日會有個疑問,點解風又打唔正我地,明明吹左去海南島,但都會咁大雨,甚至搞到天文台掛個黑雨,然後柴灣變成澤國,然後依家政府好似連解釋半句都費事架呢?

柴灣浸到咁,除左因為豪雨又千年一遇,所以香港既排水設施即使跟上強國既科技發展都未能有效排洪之外,其實颱風入秋先黎造訪香港,亦有一定關係。稍後常識都知道,如果正常情況,香港入夏就受西南季候風影響,入秋冬就開始有東北季候風。東北季候風形成,係因為華北氣壓上升,所以北風吹黎,而且係較為乾同埋較為冷既。所以香港入秋冬,天氣當然會轉涼。

之但係熱帶氣旋,即係香港人成日講既打風,就完全唔同既另一個天氣系統。佢係係海上因為擾動生成既低氣壓,入面無非都係以水氣去驅動。北半球既颱風,以逆時針旋轉,捲起既氣流,當然係較為潮濕。如果係入秋時份,颱風同東北季候風相遇,不單有協同效應,令到風速增加,北邊既溫暖氣流更加會升高,撞出大量既不穩定氣團同廣闊雲帶,因而做成大量既雨水(大雨,其實係唔需要一定要美腿架)。

下,你話你燈塔係咪只係係度鳩吹架?又唔一定喎。因為香港曾經真係有條友發表報告,研究分析秋冬熱帶氣旋係南中國海不同位置同香港本地天氣關係。報告話,當熱帶氣旋進入北緯13至16度、東經110至115度之間既時候,香港就會比較容易落雨。佢係邊個?當然唔係梁振英。佢係皇家香港天文台,氣象學家奎明(M.J. Cuming)。佢1968年既相關發現,又被後世稱為「奎明效應」(Cuming Effect)。

依家莎莉嘉既橫過,極有可能做成奎明效應。不過我知依家無香港人關心,因為你地只係掛住海馬,掛住汪明荃。好啦,等遲D我再講個另一個風啦。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 144182
Date: 2016-10-19 21:03:27
Generated at: 2021-10-21 06:31:22
Permalink: https://www.vjmedia.com.hk/articles/2016/10/19/144182/奎明效應:打風不成三日雨?