TVB 陳腐,因循,向政府靠攏,主打師奶;ViuTV 呢?

 

ViuTV 本來個定位係好好架。TVB 陳腐,因循,向政府靠攏,主打多唔用腦既師奶中產,拍十年如一日既垃圾劇集,搵靚靚小花去河蟹所有政治新聞報告,是是但但,搵上圍豐滿既女藝人去拍旅遊節目吸睛,板斧咁多年黎,已經係人盡皆知。HKTV 王維基想打響電視戰爭第一炮,但係因為一男子因素而失敗,係接近滿盤皆輸。ViuTV 拎到牌,當然更加係更加小心翼翼如履薄冰。好精細咁樣去砌一個同TVB 完全唔同既創新自由開放形象。

而呢一個形象,係唔需要一百八十度轉變,只需微調。對於求變既年青人,或者一早對電視質素(而非單為政治取態)有追求既人黎講,ViuTV 的確代表一個新既選擇。無論係一開始既節目,到依家繼續播緊既自家製作,雖然無人知道收視真相係點,而且仍然蝕緊大量NOW 既錢,但的而且確睇到電視製作背後既精心計算同埋認真製作。ViuTV 想包裝出黎既,就係知道後生一代想法,有破格(例如《真PK》,《D&A選美》,甚至晚間成人清談節目等),意圖打破舊有框框,而且亦就住依家對香港過往美好所油生既本土之情,加以包裝。

所以就算係飲食節目,旅遊節目,只有舊酒,亦要新瓶。例如係講綠色食物,講素食,旅遊唔係單去日本,而係去無人知既小國。係香港,就搵就黎失落既工匠同工人,或者一D仍然堅守住自己崗位默默耕耘既老香港人去做訪問,呢D無疑,都係一堆能夠做出口碑既節目。至於劇集方面,都係採取一個寧缺莫濫既態度,但係由瑪嘉烈與大衛,以至到依家既三一如三,都係走清新既小眾路線之餘,亦都唔介意去牽涉部份香港既社會政治議題係入面(UBER、青少年自殺、自由行為香港帶來問題等等),令到成個故仔不會離地,有一種共鳴可以產生出黎。

而跟住矛盾去旅行本來係ViuTV 既最話題作,差唔多叫得做頭炮開山之作,而最吸引人睇既果個環節,就係長毛X曾主席。其實當中經過小心既取捨,牽涉既爭議唔多,最敏感既政治話題亦無出現,但效果出黎,作為一個娛樂節目,係收到成效,大家睇得開心,仲有一堆腐女係度二次創作添。係,你無睇到長毛同曾大打出手,亦都無因為講六四車死左幾多人而不歡而散。呢個就係ViuTV (原來)高明既地方。一種軟性既割捨,好似揭開左社會一種矛盾,但其實只係蜻蜓點水,咩事都無發生,坐係梳化唔願郁既各位,先係最受落。

所以你問底線係咪有,不嬲都有。之前既信報,到依家既信報,都好大分別係咪?你一方面想玩火,另一方面想玩膠,當然要適得控制力水。如果搞到今次咁,成件事爆炸,咪就係NOTE7左囉,咪搞到自己一身燶味囉。依家我地一句「屌你其實咪又係同TVB 一鳩樣」。同鴨脷洲口音一樣,無得駁。之前既各種苦心經營,咪一下子全部付諸東流囉?我真心覺得係好惋惜。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 144208
Date: 2016-10-20 11:52:27
Generated at: 2021-10-21 07:41:41
Permalink: https://www.vjmedia.com.hk/articles/2016/10/20/144208/tvb-陳腐,因循,向政府靠攏,主打師奶;viutv-呢?