乜嘢係手工啤酒

 

近年香港craft beer興起,由最初得極少數bar有供應,到而家開始打入主流市場。

越嚟越多人,因為朋友介紹,或者電視、雜誌、報紙、FB、IG見到,開始聽到「手工啤酒」呢個term,甚至飲過一兩隻,但係同時又有好多問號:手工啤酒同普通啤酒有咩唔同?手工啤酒係咪好飲d?手工啤酒係咪真係用人手製作?

 

咁就要由英文嘅craft beer講起:

 

Craft beer 嘅定義

美國釀酒師協會 (Brewer’s Association) 為craft beer 定義為「產量少、獨立製造、以傳統手法釀製」。

產量少:年產量少於600萬桶(約7.15億公升)
獨立製造:釀酒廠嘅股份之中,大酒廠唔可以佔多過25%
以傳統手法釀製:簡單嚟講,就係唔接受大酒廠用粟米/米「溝淡」啤酒嘅手法

如果我哋純粹以呢個定義計,你可能會話:「咁即係總之唔係大酒廠做嘅酒,就可以叫craft beer啦?即係同好飲與否差唔多冇關係啦?」

如果你咁諗,我會話你啱咗一半。考慮埋歷史因素,可以幫助大家了解得更全面。

 

Craft beer 呢個詞點嚟?

Craft beer 呢個詞,出現喺美國大酒廠壟斷啤酒市場嘅時候。

1978年,全美國只係淨低89間啤酒廠,而所有大牌子都只係釀造同一種好淡嘅啤酒(有上釀酒課程嘅同學,會知道呢種啤酒叫American Adjunct Lager),令美國啤酒同「千篇一律、淡而無味、低質素」劃上等號。有好多人,其實都好討厭粗製濫造又不求上進嘅大酒廠啤酒,但係別無選擇。

呢個時候,美國咁啱又放寬喺屋企釀酒嘅限制,令家釀啤酒 (homebrew) 變得合法。好多喺屋企釀酒嘅人,發覺自己釀得仲好飲過出面有得賣嘅酒,於是決定自立門戶,成立酒廠,生產更高質素嘅啤酒,滿足對啤酒質素有要求嘅大眾。

兩件事加埋,造就咗craft beer revolution。而美國釀酒師協會亦喺呢個時候將 「craft beer」落咗一個定義,幫助呢d細酒廠推入主流市場,為美國重新帶嚟高質素嘅啤酒。

可以話,美國craft beer嘅出現,本來就係釀同飲啤酒嘅人對質量有更高要求,為咗抵制大廠粗製濫造而衍生出來嘅term。如果你話釀啤酒「細規模就得,唔一定要好飲」,就等於你度身訂造一套西裝,點知質素仲衰過連鎖時裝店,自己攞假嚟丟。

 

近年Craft beer 趨勢

美國每年都有幾百間新酒廠以craft beer brewery之名成立,2015年craft brewery 同 brew pub 加埋有4,269間,但係質素控制方面開始有下滑跡象。好多人已經係以追潮流、搵快錢為目的,同當初craft beer重視質素嘅方向背道而馳。

返返嚟香港,我哋好高興見到近年craft beer 終於興起,幾年內已經有十幾間啤酒廠相繼成立。可惜嘅係,香港將craft beer 譯為「手工啤酒」,俾人一種本土手作仔、細規模、「幾得意喎」嘅印象,令部份飲酒同釀酒嘅人都忽略咗佢原有「重視質素,精益求精」嘅態度。

所以,最近香港開始有啤酒人主張大家改口叫craft beer 做「精釀啤酒」,希望由個名開始,改變大家對待啤酒嘅態度。我好同意呢個講法,因為我覺得,啤酒從來都係質素為上。酒廠大定細、產地係香港美國定大陸,都係次要。

願香港啤酒越嚟越好飲。

 

資料來源:

Craft Brewer Defined

Number of Breweries

 

 

作者:HK Brewcraft

HK Brewcraft
於2013年成立,是香港首間自釀啤酒專門店。不論你是釀酒高手還是新手,或者只是想喝精釀啤酒,HK Brewcraft 都幫到你。我們售賣高質素的釀酒工具及材料、以及超過二百款我們精心挑選的精釀啤酒。我們是一班啤酒愛好者,對香港味道一式一樣的大品牌啤酒感到厭倦,所以決定開設這間小店,希望令更多人愛上精釀啤酒、愛上自釀啤酒。歡迎隨時上來與我們交流,一起分享你釀的啤酒!

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 144244
Date: 2016-10-20 16:50:47
Generated at: 2019-02-17 08:50:16
Permalink: https://www.vjmedia.com.hk/articles/2016/10/20/144244/乜嘢係手工啤酒