不知不覺我跟了姐姐走

(photo via cc Flickr user Sai Mr.)

(photo via cc Flickr user Sai Mr.)

 

曾經,我同過一個大我四年嘅女仔拍拖。

嗰時佢問我:「你介唔介意我大你四年?」

四年代表咩?代表我入大學嘅時候,佢已經出黎做緊野。都可能代表我學生哥嘅零用係唔足以同佢出去食啲好少少嘅野。嗰時嘅想法好簡單,以為出左黎做野,洗錢會豪好多。

「聽講女人平均遲死過男人,咁你介唔介意老左同我一齊死?」當時我十八歲,為了愛情,幾核突都講得出。

基於大家互相迷戀,同埋大致上雙方都係庸俗嘅人,佢覺得我呢個講法有啲浪漫,故此無去深究大四年同一齊死有咩關係。總之我地就一齊左,姐姐對我好好,打點晒我所有行程,甚至旅行嘅itinerary都會事前用excel整出黎。次次出黎行街睇戲都幫我帶定支水同紙巾,體貼得好交關。

因為佢對我太好,有人笑我,話我溝左個工人返黎,有次重當住姐姐面,以一個扮講笑但其實笑鳩你嘅tone去質問我。我見到女朋友一副唔開心樣,我只好話:「其實我係佢隻Barbie。」

兩個人一齊嘅時候,佢真係會幫我梳好個頭,同我僅有嘅頭髮,扎個衝天炮嘅辮,用盡佢麻麻嘅Fashion sense幫我襯衫,總之Barbie首歌入面講嘅野佢真係做得齊。

姐姐佢到底係點嘅人?

好奇怪,我見住佢同其他朋友講野可以大大聲,巴辣倀雞以一敵百,見到我就會變到好感性,好識體貼我嘅需要,令我覺得自己好似一個比佢釋放母性嘅媒介。

姐姐生得都幾高,172cm,而我是個唔夠六尺的矮撚。換言之,佢著高踭鞋,我會有些少暗湧。同姐姐出街睇戲,拖拖下手,佢會無啦啦攬住我手臂,成個人痴埋黎。呢個動作嘅合理高度差應該係15 cm,姐係理論佢個頭應該係斜斜地挨落我三角肌附近。

而唔係好似當時咁一個突如其來斜斜地撞爆我顴骨。

「無事嘛!你痛唔痛呀……?」第七百二十三次,佢大力左。

「對唔住呀,我生得唔夠高。」身高係我地兩個永恆的痛,而呢件事具體反映落我顴骨度,撞到骨頭多數得兩個結果:一係唔痛,一係超撚痛。

我眼水都流埋,唔知姐姐係咪練過鐵頭功。

於是佢以後都無咁做,但佢對我無微不至,間唔使帶我去啲位置山卡啦但係要排好耐隊先可以入去食半個鐘嘅餐廳,佢係又靚又高又叻嘅姐姐,我只係一個普通人……

重要差幾cm先到六呎。

分手嘅原因我已經唔太記得,大概係我講左啲真心說話,例如其實我覺得搭車排隊兩個鐘排隊企一輪先可以食半個鐘野呢件事有啲難以接受,例如咁樣食完野再要原路搭返出黎真係有啲戇鳩。例如我其實唔係一個浪漫嘅人,成世人最怕麻煩,唔洗任何人貼身照顧我,亦唔想反過黎好似湊細妹咁照顧佢。

我睇得出佢內心呢個渴望。

佢個心係個一米五五高又細粒又矮又想人呵護佢嘅小朋友,所以我係佢呢種渴望嘅一個投射,只不過我唔係佢搵緊嗰種人,我扮唔到。

而勉強嘅結果就正如顴骨慘劇咁,辛苦到我,佢亦都得唔到佢想要嘅感覺。普通嘅分手故事,我講唔到好驚人嘅劇情。

有人講過,有時聽某一首歌,你會諗返起某一個人。姐姐好鍾意周杰倫,重要係好堅持「《范特西》之後周杰倫走下坡到依家」嘅偏激/客觀(我都唔知點形容)歌迷。

所以我每次聽到龍卷風,我都會諗起佢。

不知不覺 你已經離開我
不知不覺 我跟了姐姐走
後知後覺 又過了一個秋
後知後覺 我該好好生活

 

 

作者:求其花

求其寫,求其賣,求其志不求奢華|求其真,求其愛,求其花不求其果

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 144453
Date: 2016-10-23 12:25:17
Generated at: 2021-08-04 13:58:20
Permalink: https://www.vjmedia.com.hk/articles/2016/10/23/144453/不知不覺我跟了姐姐走