得罪講句,識睇家教,一定係睇下家長點對工人姐姐

最新文章綜覽 / 親子王朝

 

(photo via cc Flickr user istolethetv)

(photo via cc Flickr user istolethetv)

 

我屋企窮咁,請唔起工人姐姐。但就去過好多家補習,見過好多工人姐姐,講真,睇一個人家教,睇下佢個家既個工人就得。如果你有小朋友既話,你點對個工人姐姐,其實對你個小朋友係好重要嫁。

 

最記得初初出黎做野,個一家人好錫工人姐姐,我地成日坐埋一齊食飯。如果姐姐想睇既電視節目,都會俾姐姐睇。有一次,個仔番黎同工人姐姐講粗口,姐姐發脾氣左幾日,冇理佢。後來,屋企人不單對於姐姐個陣反應真係冇講過啲咩,仲叫個仔道歉。我仲教佢寫道歉信貼係姐姐間房門度。

對個一家人既記憶就係,工人姐姐都係個家人既一份子。然後我番工收工番緊工都會同佢傾計,即使係個家人面前都冇所謂。個家係我去過其中一家覺得最warm既一家,小朋友未必係好催谷個種,但係待人處事同其他小朋友寧舍唔同。

 

有啲家就似乎好有家教,冇咩話為難工人姐姐,小朋友都有基本禮貌,但真係好基本。小朋友會聽工人姐姐講,但係都只係唔准既事唔會做。但係要啲咩攞啲咩係唔會講唔該。佢地知道工人姐姐係有份管佢地,但唔會對工人姐姐有對爸爸媽媽個種耐心,都唔會有對老師個種尊重。所謂既唔頂撞,僅限於「我知道我爸爸媽媽唔係度既話你係最大既大人」。但係食飯個陣已經係分開食,個一家,完全冇見過個姐姐同個家人同枱食飯。工人姐姐鍾意同我傾計,其實我唔知佢幾多人工,但佢發現左我啱傾,又覺得我同妹妹上堂好開心之後,佢走黎同我講佢都想學寫中文字,講正少少廣東話(佢啲廣東話其實真係好好嫁,溝通不曾出過問題),學少少咁多普通話咁。

佢每次同我傾計,都唔會係太太先生係度既時候傾。我知道,佢應該係有些許寂寞。咁既狀況,我估都係可以感受到身份既差距吧?

 

再去到有一家,爸爸媽媽都成日好忙。小朋友唔服個工人姐姐就睇得出嫁啦,我都冇乜機會同佢傾計,所以咩都唔知啦。最初小朋友都唔太服我。不過大家相相處下,我成為左個小朋友一個好重要既人,一個月就會有幾次小朋友會喊住捉住我同我講「姐姐,你唔好走好冇?你走左我就好寂寞嫁啦。要自己一個人食飯,可能到訓覺都仲未等到屋企人講故事我聽,要一個人訓。仲要得工人姐姐一個係度,佢又唔會同我講野。你留低好唔好?留耐啲?」第一次見到個陣我真係心都痛埋,小一既妹妺個口講「寂寞」,不斷強調所有野都係「一個人」。所以雖然妹妹平日好寸嘴,屋企都係典型中產咁,爸爸媽媽都係一副望女成鳳、悉心栽培既感覺。

再落已經係家教好差既家庭,唔單只對工人姐姐差,連對我都可以講得出「我媽咪俾錢請你咋。我唔鍾意你,我可以叫你走,我可以叫媽咪炒左你」。又係小一咁….再見埋佢母親本尊,就知道佢母親其實都真係好……「姐姐,你英文有冇accent啊?」「其實不嬲我個女都好smart既,所有野識自己做,唔洗你點教。不過呢,係搵個tutor黎,陪下佢,等佢做功課個陣冇咁boring囉。你都明既?」「呢啲其實佢不嬲都take it easy嫁,從來都唔覺得difficult,我估佢今日係太tired姐。我個女咩都識嫁,你都係個student黎姐,書都未讀完。」嘩,屌,我真係歎為觀止。

 

請工人姐姐照顧小朋友真心我覺得冇咩問題。但一定冇話請工人就特別差啲,差唔差,好睇家長本身點對個工人姐姐。個家長對工人姐姐或者差既,個小朋友有樣學樣,家教好極有個譜。

另外就係請工人姐姐之前,你要諗下你係想搵個人幫手照顧啊?定係你係單純搵個人望住你個小朋友?定係你要請奴隸獸?

你請左工人姐姐之後,係咪覺得咩都可以假手於人咁囉,呢個唔單只係點對人,而係你打算點對你小朋友。你打算俾佢寂寞既童年定係點?

如果你真係忙既,仆街地說有冇諗過呢個工人姐姐有機會係你俾你小朋友既一份禮物?至少,你對工人姐姐好,工人姐姐錫你個仔女,大家真係一家人咁既。你忙個陣,或者,佢可以令你個女童年唔係去到喊曬口咁同個補習姐姐講寂寞。

我未生過都心嗡啦,你地生左就更加要諗。

 

作者:Echo

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 144520
Date: 2016-10-24 16:08:25
Generated at: 2020-10-30 09:23:39
Permalink: https://www.vjmedia.com.hk/articles/2016/10/24/144520/得罪講句,識睇家教,一定係睇下家長點對工人姐