假幣驅逐埋劣幣

maxresdefault

 

之前我吹水分析過劣幣驅逐良幣,但講漏左一句就係,當呢個現象走到下一個極致,可能就係假幣驅逐埋劣幣。

當中有少少分別係,劣幣雖然質地差,但都叫做可以當錢駛下,但係相對起黎假幣直頭係假,有毒,會害死人。但依家假野一樣有市場。情況就好似網上紅人話自己會做呢樣果樣,但到頭來俾人盲目捧紅左就話自己擺到明走數,分明做假,但就硬係借網上之力去令自己出名。至於果D一圖易SHARE既內容,往往都好吸引人地眼球,講一D好似好近乎COMMONSENSE既常識,點知DRILL落去先發現,原來係錯的。例如係咩正音呀,咩香港字蝗字呀,粵語正字呀等等,數之不盡。但無人去做考證,不如鳩些左先,結果假野流動程度比真野更快更強。

網上資訊已經爆炸,一秒個FACEBOOK已經幾千條FEED,要逐個逐個去仔細睇已經好困難,所以第一樣野就係「TLDR」法則,即係太長即飛唔睇。文章長,當然不利一個無耐性既人去閱讀,但如果一個問題係複雜,而且牽涉既內容深入,要邏輯強而且有組織,長係接近無辦法既事黎。於是好好解說唔得,不如就BULLET啦,變一句啦,變一張圖算啦。公眾會易接受好多。仲去GOOGLE SCHOLAR慢慢睇PAPER,去LIBRARY搵本書睇下?到日落西山,你行番出黎,世界已經唔一樣鳥。

再者,如果受眾根本都唔識分真假,可能係無時間,或者得罪講句,係無咁既智商,都係無辦法既事。我地慢慢俾呢個世界潛移默化,放棄對知識既根本追尋,希望所有野都可以即食,唔理好醜真假。當一樣野放出黎,係好易DRAW到你既ATTENTION既時候,你可以好快地俾左反應(例如LIKE)先,然後先再用腦做思考判斷,甚至完全唔做。呃LIKE,其實就係CLICK果下果幾秒就夠。就算後悔,都好少有人走去UNDO了。

最慘既係當如果有若干堆人都想傳播佢地既思想既時候,見到做假果堆又唔駛咩成本,呃LIKE又快,又多人睇,佢地就會好納悶了:屌咁我仲咁認真做考證做乜柒,都唔會有人睇架啦。寫到D野又長又臭,做晒REFERENCE,原來世界係WFC,不如我又放棄做真野,加入埋劣質派、假野派咪算。於是願意花時間去搞精細野既人愈黎愈少,結果影響埋個SUPPLY,為害可能仲大。

「究竟呢樣野有幾真?」漸漸就唔會有人再問。人係捨難取易,呢個可謂天性。所以就算質疑,就算去炮轟,都揀D自己熟同埋自己易入口既野,其他野就唔(敢)理得咁多。所以如果果個人扮晒好權威,又整D好易入口既糖衣毒藥,唔好意思了,得罪講句,係呢個世界,依家大把人排住隊爭住食,甚至自己自動入教,將錯誤既野繼續傳播去世界每一個角落。對人類社會為害有幾深?唔知。例如當一句「認真你就輸鳥」成為我地呢一兩代既格言,甚至為自己開脫做藉口時,我都唔知會唔會真係有咩跟蹤研究去睇會點影響佢地既人生。。。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 144586
Date: 2016-10-25 13:30:31
Generated at: 2021-10-21 07:36:40
Permalink: https://www.vjmedia.com.hk/articles/2016/10/25/144586/假幣驅逐埋劣幣