遺憾既係,好多人,樂見游梁落台

立法會 宣誓 DEREKYUNG 攝

 

權術高明者,最懂得煽動,製造各種輿論群眾壓力,玩忽民意去產生一種大家好似置身係同一條船既共業,達成佢要既目的。呢種做法並唔容易,要對人性有好透徹既理解,充份明白人既各種缺點同埋弱點係邊,先至能夠得心應手。任何野就算幾完美無瑕,無堅不摧,都有一個切入點,只要有切入點,一切都可以係果一下推翻。正如解構主義者所講,存在同埋矛盾,要將一樣野土崩瓦解,就係研究既方向。

六八九雖然無恥之極,但係計算總係懶係準確。兩位議員依家被禁,甚至同依家既JR無關,兩者可以分開睇。被利用並且不斷強化既,係佢地被暗地裡強加既原罪:第一印象。激進,年青,港獨,愚昧。佢地係議事堂講粗口,宣誓唔檢點,其實之前唔係無議員未試過,之但係,係香港絕大多數人眼中,佢地係年青人,初哥,甚至只係野桀不馴,就單係呢一個形象,就可以利用。講粗口本來唔係罪,但將佢無窮放大,就係硬係可以講成:教壞細路。

教壞細路,就必然唔會得到中產家長既支持,因為中產好多都有細路。佢地好愛錫子女,珍惜羽毛,一聽到粗口,就會皺晒眉頭,單係咁SUBTLE既呢一點,就已經可以無限SPIN。愛唔愛國呢D就無謂講,支那辱唔辱華都係上綱上線,但係粗口係好多表面斯文,漠視日常既制度暴力既香港人黎講,就係好大罪,就同紋身一樣,遠古就STEREOTYPE左唔會係好人。年紀輕輕入議事堂就係度串串貢又言行小學雞?年紀稍為大D既,都會即時覺得反感,認為佢地行為過火,唔抵同情。六八九同建制派睇通香港人既特性,唔會因為咁而立亂去撐佢地,於是JR之外,即時再度攜手出招。

從林鄭同意建制派流會之後,你已經明白梁君彥收到風,必然會識做。兩人幾星期來,輿論處於捱打既孤立狀態,政治層面,泛民當然唔會幫到出面,而熱血公民一向同青政已經結下天大既樑子,佢地出事,可謂人人稱快,況且教主單野未寒,邊個仲得閒理佢兩個傻HI?一整個氛圍,就可以成為一種另類既民意同政治授權,係虛無飄渺,但又實在,於是建制派開始講:好多人都反對佢地咁做喎,而梁君彥自然亦和應,識時務者為俊傑,即時落閘放狗。

果D咩三唔三權分立,議會功能已廢,香港已死既老調牙陳腔濫調,TRIVIAL野不是呢篇文既重點。六八九佢真係識得玩,果陣選特首,民意最高。依家,係可用既辦法入面玩到最盡,呢點係佢角度,絕對係做特首既優點黎。成報背後想做咩都唔係佢既層次黎,但重要係佢懂得走位,已然足夠。香港人既共業,永世都存在。因為市民都普遍唔想出頭,就代表即使有咁既政治動蕩,香港繼續係可以安居樂業。食飯買下送,睇下無線,咁又一日。有幾萬票民選入唔到議事堂,Oh that’s sad. That’s all。

網友F果日話係法庭出面見到一切情勢已變,遍體生涼。係歷史既長河,所有野都係鏡,亦係滄海一粟。二戰時期,唔少人踢入集中營,都以為只係體力勞動,甚至有人自願去看管走犯,無人知果D係死亡營。因為入口既招牌仲寫住:勞動帶來自由!Arbeit macht frei!信者得救,係真架。坦白講句,香港人其實大部份人都真係好愛國,亦都支持兩方加速融合的。游梁兩人成功落台,好多人都有開心幫到手。完。

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 144632
Date: 2016-10-25 23:25:30
Generated at: 2021-10-21 07:24:31
Permalink: https://www.vjmedia.com.hk/articles/2016/10/25/144632/遺憾既係,好多人,樂見游梁落台