蝗蟲既特質

 

(photo via cc Flickr user Bob Peterson)

(photo via cc Flickr user Bob Peterson)

 

蝗蟲係咩生物,大家都知。但係你或者唔知既係,係生物學角度,蝗蟲同草蜢,其實係接近係同一種物種黎。生物同基因學家,對於蝗蟲好有興趣,因為蝗蟲幾千年為患,消之不絕,一直除左人類之外係對文明既另一個好大既威脅。點解草蜢就獨來獨往,但係蝗蟲就聯群結隊,結果成千上萬咁樣去攻陷一塊又一塊農田呢?

科學家做左一D研究,佢地首先將一堆草蜢放埋一齊,然後觀察,但發現佢地無咩特別,亦唔會去彼此溝通。然後,科學家開始搞野,將D草蜢既後腳用擦去掃下,然後再放入去個玻璃管到睇,隔左無耐,佢地就發現隻草蜢開始「蝗蟲化」,痴埋其他既草蜢度。詳細情況我就唔記得太清楚,因為睇果本書好耐,不過,由於草蜢同草蜢既互相磨擦,就會令佢地產生質變,變成蝗蟲,我諗呢個講法,係雖不中亦不遠矣。

而呢一種極速既轉變,科學家認為對於佢既生存黎講,係有利的。始終群體既活動,都比係一個個體既活動,來得有優勢。講左咁耐,我只係想提出一個假想就係,生物其實有一種群體既心態,大家做同一樣野,未必單純係心理層面,只係咩怕孤獨之類,而係呢個係生物上既本質。等於人面對危險會突然莫名恐慌,想逃走,呢種亦係生物上想提早存活率既過敏反應。

人都好想獲取認同。一個人如果做左一個決定,無其他人干涉,佢亦都無從得知其他人既選擇,佢必然心安理得。但當一個人做一個決定,有成千上萬既人都同時跟你一齊做,佢就好想得到當中既共識,取得果種快感。考完試出黎,有無班人好想同同學對試卷,然後大叫:我都係咁答?去職場面試,你係咪多數聽人教路,去了解面試官既職位同埋專長,專登係果方面表演自己,去增加被錄取既分數?

呢個世界只有鐵石心腸既絕對強人,至可以力排眾議。但係所謂真相,對與錯,水落石出前,佢可能已經被公審,輕則千夫所指,重則當眾活活燒死。可能人既本質,基因深處,就係無反省既機制,或者咁講,反省機制要觸發既時間,比去增取認同去獲取安全感,來得太慢。於是原來果條題目,屌,答案竟然係E。但係果陣你有開心過,因為成班人同你一齊錯。

YES,出份卷果個人,就係689呢種人。佢然後會用血紅既筆,係你份卷背面,畫上一個關愛座一樣既笑容。利用人性既弱點去玩,真係會覺得好好玩。好悲?好灰?又唔駛太。因為聖人係人類歷史,都被打入地獄,千年後先平反。大家都樂於選擇做小人,「為世所迫」,「身不由己」,如果小人就係呢個世界既多數,選擇是容易的,懺悔是事後的。公義值幾銀。係0呀,哈利。路亞。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 144668
Date: 2016-10-29 12:40:45
Generated at: 2021-10-28 02:32:05
Permalink: https://www.vjmedia.com.hk/articles/2016/10/29/144668/蝗蟲既特質