做老師既,一句身不由己真係大哂

(photo via cc Flickr user Yusuke Umezawa)

(photo via cc Flickr user Yusuke Umezawa)

 

中國傳統觀念,所為明哲保身,事不關己就己不勞心,做人既顧掂自己咪得,邊個咁得閒埋人地d野?老老實實,如果你係身處一個職場如戰場既世界,你有咁既諗頭,我唔會怪你,但作為春風化雨既老師,唔該更正下自己既思想。上面果兩句,講得好聽既叫做中立,講白d既就係自私自利見死不救。經過時代既洗禮下,老師已經發展出一套新既開脫技巧,叫做身不由己。身不由己最西利既地方在於做人唔單止係中立,仲可能係迫害者,做完壞事之後為自己良心好過小小既籍口。

如果大家未見過咁依班咁既老師,我真係為你開心,因為你班老師仲未衰得哂,仲未咁偽善。如果你曾經遇過依班老師,我真係為你傷感,因為你班老師就係人稱教畜既物種。

唔明唔緊要,只要舉幾個例子,或者大家就會諗番起自己既中學生涯。

中學最緊要既就係爭排名,爭公開試成績,學校入面都要同其他同事爭上位,學生就成為老師上位既踏腳石。學生表現好,考試叻既,校長就認為你有料,可以比你上位,相反就成世冇得升。美其名係為學生著想,所以日日瘋狂比功課,學生根本消化唔哂,但唔比又好似怕輸蝕比其他班,情況就好似怪獸家長幫自己個仔填滿哂時間表一樣。咁叫為學生著想咩?只要你唔交功課就一口咬定你懶,之後全面封殺所有課外活動,除非你泊到好碼頭,係校隊主力,否則你既人生就恍惚只有讀書。老師只係會話身不由己,呢個社會對學生既要求就係咁,佢地咁做係為你好,佢自己都唔想學生咁辛苦。事實上,今時今日社會之所以訓練成一個又一個既讀書機器,全靠我地既老師造成。

學校咁多老師,唔多唔少總有一、兩個特別睇學生唔順眼,無端端就會小你一獲。好明顯,唔單止係學生,仲有老師都知道有d同事好中意搵學生出氣,見到上司無理取鬧,有幾多個老師真係會幫學生出頭?為左唔好得罪自己既同事,好多老師都當睇唔到,好人d既就會私下叫你忍,但從來唔會幫學生爭取公道。就係因為一句身不由己,認為老師鬧學生一定有原因,或者自己無權理,所以眼白白睇住學生比人恰都當冇事發生。

有時候校長真係小小人工要求多多,又要馬兒好,又要馬兒不食草。可能一個老師就要帶幾樣活動再教幾科,但係校長成日要求高高,成日話拎唔到獎,成日將錢偏重係幾個拎到獎的活動,咁樣對其他學生絕對唔公平。老師開會果時正正想同校長反映,其他老師明明都有同樣既感受,但因為身不由己,認為自己人微言輕,都係打份工姐,自己同埋班同事辛苦少少都無所謂。變相邊個出聲就邊個做左傻仔,其他人都係敢言不敢怒。面對不公平既事都唔敢反抗既,點樣可以教學生?
教書果時,唔多唔少都會見到欺凌學生既個案,但係大部份老師都唔識處理或者唔想處理。黑社會收保護費同埋打學生就唔提,因為太過極端,唔係間間學校都有。但每一個年級仲有人會成為傻仔,成日比同學暗串,收埋佢d野,或者係成日撞佢,呢d情況明明老師都睇得一清二楚,但往往只係口頭上講一兩句就算,完全冇諗過要幫果位同學出頭。說穿了,都係唔想因為一個同學而得罪全理人,費事搞到自己教書教得咁辛苦,又係一句身不由己,唔係唔想幫,而係幫唔到。到欺凌者忍唔住出手打人果時,老師就會開聖人mode,叫大家和和氣氣,話打人既同學仔點都好,打人就唔岩,老老實實真係難聽過粗口,仲黑暗過d法官。

老師為左輕輕鬆鬆教書,唔想咁煩,有咩事都會叫學生自己搵答案,自己試下,一打鐘就唔見人,學生永遠唔會搵到佢。如果閣下有錢去補習社,或者本身係醒目仔女,咁冇問題,可惜既係大部份學生都唔係聰明仔,往往操操下卷果時唔明都要搵老師,但老師係唔係一定答你呢?又係身不由己,所以早走係因為要照顧仔女,所以人地既仔女學業問題就唔使照顧。因為自己唔想另外查書解釋,所以就叫學生自己搵,話要幫學生思考,唔可以成日靠老師。成日話學生做咩上堂唔問,點都好,講到自己好想答,好想幫,但就偏偏唔係學生需要你既時候幫。

老老實實中學真係一個黑食黑既世界,作為一個醒目既學生真係要搵個老師泊碼頭,正如打狗都睇主人,只要老師夠硬,果個學生真係做咩都冇問題。老老實實雖然教我既老師都唔會太差,老師都有唔少好人,但唔可以否認既係太多學生都經歷過依d問題。老師或者希望想投身教育界既朋友,唔該比番少少做老師應有既態度,你地既工作唔單止係教書,而係教學生做人,所謂其身不正難以正人,如果你唔想理既,就請你去補習社番工吧啦。

 

作者:筆知所謂

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 144900
Date: 2016-10-29 05:55:47
Generated at: 2021-12-09 05:42:31
Permalink: https://www.vjmedia.com.hk/articles/2016/10/29/144900/做老師既,一句身不由己真係大哂