入得魚檔多,都會慢慢聞唔到魚腥味

(photo via cc Flickr user Robert Lowe)

(photo via cc Flickr user Robert Lowe)

 

韓國爆出政治醜聞,總統面臨巨大既下台壓力,佢頂唔頂得住,仍然係未知之數。岔開一筆:

有D人又當然要趁機去讚賞韓國人既示威方式自反世貿示威都係走在最前,然後痛恨香港人仍然昏迷不醒,無豁出去之心,令香港風氣始終都難以為之一變。但我就認為,夾硬去一次又一次拎韓國同香港既市民比較,其實係無用既,亦都係有D不切實際。始終,兩地既文化背景,已經差天共地。

況且,政治一片昏暗,前途不再明朗,人生到最後都係求易捨難,但求醉生夢死。一單又一單的醜聞,令所有人都跌入一種金屬疲勞,就算意志幾堅決,一如金銀鐵石,到最後都會屈服,甚至到最後,係摧朽拉枯之勢。人既接收能力,畢竟有限,雖然唔係故意,但大腦會自動適應,做成一種後天既充耳不聞。係人都知,入得魚檔多,都會慢慢聞唔到魚腥味。當大多數意志已經覺得無力再挽,何不效發竹林七賢,飲酒彈琴,平日吟下詩算。同現今社會,所謂既網上圍爐都差唔多。好快FB都會幫你過濾晒唔岩聽既野啦。

今日中西區,入夜好多人。係辦公室出去買個飯,道聽途說,都唔難知道,香港人依家呢一刻最關心既,仍然係自己都無份選既特首選舉,萬聖節派對,又或者係美酒佳餚節。你如果係果度,突然呼天搶地話:「香港人無得救喇,哀傷莫大於心死喇。」D人會以為你痴拎左線。據聞鐵達尼號沉沒之前,係有目擊者見到有隊弦樂隊完全無打算逃走,繼續拉琴直至唔知幾時,應該陪埋隻船一齊,葬身大海。究竟係乘客似我地,定係拉琴既似我地??

最後既琴聲,總係特別動聽,正如戰亂中所綻放既煙花,總係格外迷人。係如此良辰美景,同其他人繼續滔滔不絕講亞洲政治局勢,普遍香港人都唔會好受落。你話IU演唱會會飛有得炒,就話。正如有個小說人物曾經問:

「你有無眾人皆醉我獨醒既勇氣?據講會痴線。」信焉。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 144994
Date: 2016-10-30 21:28:57
Generated at: 2021-10-28 02:47:53
Permalink: https://www.vjmedia.com.hk/articles/2016/10/30/144994/入得魚檔多,都會慢慢聞唔到魚腥味