其實唔識教既,做咩仲要生仔女?

(photo via cc Flickr user Dora Hon)

(photo via cc Flickr user Dora Hon)

 

結婚係香港係好畸型,我開左個系列都未寫完,如果講幼兒教育,就更加痴線。我只能夠好簡短花幾分鐘講,有一個最大既問題係,所有父母都假設對佢地既愛,就代表要俾最好佢地,先叫到表達到出黎,但佢地唔識係果度加一個時間掣,結果搞到好似量化寬鬆咁。所以無可避免地,大部份既細路如果屋企條件許可,都會過住養尊處優既生活,可能一直去到十八歲都仲係咁。

呢種做法,可謂違反動物界既一般養兒方針。任何既動物,去到某一個位,都會開始做CUTOFF,刻意訓練幼兒既自立能力,有D甚至會即刻自己劈低堆仔女,係遠處觀察,等佢地自己去打獵,等佢地碰釘撞板,等佢地搞個灰頭灰臉。如果唔鍛鍊佢地面對逆境既能力,又點可以提高日後生存既機會?我地就反其道而行之,一直都俾最好既野佢,個後果係:

佢由細到大都只會係果個層級既野,先滿足,然後根據經濟學定律,佢就會習而為常,UTILITY向下,最後抗拒一切層次較低既所有野。佢亦都從來無一個要自己發奮向上既INCENTIVE,因為由細到大都好,想追求既野一切一切,已經全部擁有晒。佢唔單止飯來張口,甚至有一隊既外傭跟足跟入,然後仲可以學阿爸阿媽一樣對佢地呼呼喝喝。

幼兒係白布,係吸收最快時期,個模定左,往後再改,已經太難。當佢知道個世界錢係唔重要,佢唔知你地班友咁辛苦做乜。何不吃肉麋既CONCEPT,其實就係咁黎。我尋日行過條街,見到有對母女,母在前,女在後,女識行,大概三四歲,著住白雪公主衫,好可愛,但係佢跌左條薯條。佢即刻大叫呼喝左一聲。之後發生咩事?阿媽好似撞邪咁,即刻調轉頭行,幫佢執。再抱起佢行。

果一剎那既震撼,不亞於689係台上俾心心出去,世界末日一般。依家大家唔係教仔,係教木偶,好似搞BARBIE咁,只求著靚衫,其他入面個腦裝咩好少理。好得人驚。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 145055
Date: 2016-10-31 18:49:31
Generated at: 2021-12-09 18:10:10
Permalink: https://www.vjmedia.com.hk/articles/2016/10/31/145055/其實唔識教既,做咩仲要生仔女?