只要市民成為既得利益者既一部份,政權就可以平穩。

 

(photo via cc Flickr user David Woo)

(photo via cc Flickr user David Woo)

 

一個權力要穩,就要分權。

歷史上好早已經識咁做,呢樣野,係初中課本,叫分封諸候,其核心思想就係在於,到有危難既時候,等佢地可以出兵勤王。但人性是險詐既,果十幾條友唔係立戰功者,就係皇室血脈,結果往往就趁亂起兵做反。靠幾丁友去維護一個政權,係唔會WORK的。咁不如分權俾堆唔會造反既人?例如平民,唔知有無得諗呢?講就容易,但邊個手渣實權,唔會心思思想造反?

但事實上又的確有人諗到呢條絕世好橋。首先,讀既書入面,要講到明造反就係天理不容,有違幾千年既王道精神。第二,分權既過程,最好要有一個盡量公平,人人都有機會既制度,只要一條村有人成功,就會有人努力去模仿去嘗試;第三,分到權既過程,一定要愈漫長愈好,最好既消磨到心志,用盡年青人所有力氣既;第四,有權,就要有利。一定要KEEP住有INCENTIVE,所有人先會爭住前仆後繼。

呢個係中國歷史上,就係科舉制,當中去到明清既科舉制,更加係千錘百練,無比精純,制度就係一切,讀八股文無用,無所謂,最緊要到最後,莘莘學子可以做到官,渣到旗,唔貪就可吃朝廷俸錄,貪就更加可以榮華富貴。呢種係依家既世代叫咩,就係向上流動性。即係UPWARD MOBILITY是也。點解年青人無野做,為政治不論中西,咁多年黎都係咁緊張?其實真係好易解。

只要市民成為既得利益者既一部份,政權就可以平穩。老毛上場,第一件事,就係土地改革。打盡地主,分地俾農民,人人開心,奉若神明。英國治下既香港,當然亦都深明此道。無科舉制,但係有類似既野,而且,佢仲再開一個外掛,令到成件事得以發揚光大。呢個就係本來無一物,但一下子就係皇權底下,點石成金,成為群驢追逐既紅蘿蔔條。地價。地價抽升,租金就同樓價一樣,如同汽球一飛沖天。當中抽稅,政府收入可保,而更重要既係:

邊個上樓,邊個確認到樓價只升不跌,邊個就係既得利益者,邊個就可以繁榮安定,拒絕改變可能帶來既一切動亂,亦都成為政權既守護者。今日強大既中產力量,就係三四十年前諸位努力向上既阿爸阿媽。佢地咁辛苦捱到,先有佢地今日,有我地今日,上左去,仲邊有咁易落得番黎?當然,改變係可能,中產亦唔一定係鐵板,但個條定海神針,要第一件事拎走。只要地價崩潰,樓價下挫一如九七九八,神話就會即時覆滅。如果六八九今次連任成功,但係老董反而被轟落台,我會話咩都唔關事--

因為,樓價唔跌,先係最重要既因素。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 144666
Date: 2016-11-01 05:14:17
Generated at: 2021-10-28 02:51:42
Permalink: https://www.vjmedia.com.hk/articles/2016/11/01/144666/只要市民成為既得利益者既一部份,政權就可以平