口講反政府?咪又係爭先恐後考警察AO/EO~?

(photo via cc Flickr user James Cridland)

(photo via cc Flickr user James Cridland)

 

係教育方面,香港人有兩樣野係永世都甩唔到:

(1)崇尚天才,資優,神童。
(2)書中自有黃金屋。

係,一方面,香港人好反建制。好渴望民主,去雨傘運動,想踢走政府,一新氣象,建立民主社會。但另一方面,佢地普遍都唔想下一代去搞政治,因為政治本身就係骯髒不堪,係佢地既角度。所以佢地亦唔希望打破教育既本身制度。最希望既就係細路讀好書,然後最好自己拎埋獎學金去牛津劍橋,MIT哈佛,然後係美英落地生根又好,返黎高薪厚職就最理想。當然,比較次等既,去考警察,AO/EO亦好好,起碼收入唔錯,夠晒穩定,上車有望。其他野駛咩理?

於是依家有好多樣野都係爭崩頭的。第一,公務員既考試。以及當中既考試班同基本法班,不知幾多人報。第二,可以幫佢地仔女平步青雲既學校。個需求高到一個地步,學費可以貴過大學,甚至門檻亦都高到無人有,因為孩童唔單止要有金去打造既履歷表,甚至要通過重重面試,而學校仲要係唔一定收你,因為人龍實在太多。我係學校我都釣高黎賣。但唔緊要,只要買到一個令仔女飛黃騰達既希望,傾家蕩產都在所不計。

孔子話要因材施教,就係明白每個人既ENDOWMENT都唔同,所長都唔同。佢亦都理解到每個家庭既背景同財政狀況都唔一樣,所以收既學費都唔一樣。但係依家既香港,SORRY,孔子都俾趕走啦。一句輸在起跑線就已經收你皮。仲要係無得上訴果隻。依家要求既細路,最好就係可以做到晒大人既所有野,而就算大人唔識既,佢都要識。唔好問我點解。我真係完全唔識解。但總之一大堆癲人係度追逐,最後當然所有人都會癲晒。

治大國如烹小鮮。教孩童如煮即食麵。呢句話係我講既。太早落麵,麵會過熟;太遲落麵,麵會過硬。水唔滾就煮,當然食左就會肚瀉。當然你煮辛辣麵,公仔麵,出前一丁,各個掌握火候都有所不同。我知依家好多老豆老母已經因為有晒工人而唔識下廚,但學TVB煮個麵都識掛?煮麵係咁,教育都係一樣。你叫佢一歲學量子力學,係好威威呀,但最後有撚用,唔通佢會變愛恩斯坦咩。

對唔住,愛恩斯坦細個係低能架。好遲先識講野架。係香港一早入左特殊學校啦。相對你老味咩。仲問:望子成龍有咩錯??放工。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 145074
Date: 2016-11-01 04:41:15
Generated at: 2021-10-21 07:59:36
Permalink: https://www.vjmedia.com.hk/articles/2016/11/01/145074/口講反政府?咪又係爭先恐後考警察ao/eo~