細細個因為AEGIS令我搞亂AEIOU

 

世紀帝國分別出左3集再加埋幾個新版文明,但最為人津津樂道,而且普及性最高既始終都係第二集。筆者有幸生於世紀帝國,無疑係人生一大樂事也,讀者未必同過朋友仔聯機,但單打獨鬥都一定唔會少。如果你問我世紀帝國三有咩好處,我可以數十個比你聽,畫面好,夠逼真,兵種相剋,多任務玩,但唔知點解硬係取代唔到世紀帝國二既地位。可能正正因為世紀二太過神,令到佢係機友心中留低無法取代既地位。

呢一篇絕對唔係宣傳文章,今日筆者只係想同各位分享下世紀帝國有咩咁好玩,點解咁好玩,希望已成大人既你地,可以好好回味細個果時,世紀帝國二帶比你地既一點一滴。

先講任務模式,法國、蒙古、阿茲特克、韃靼、條頓等等任君選擇。細細個果時每個男仔都想幻想自己係一個傑出既領袖,正正係世紀帝國比左依個機會我地。機友可以代入當時既歷史人物,跟住歷史作出每一個決定,可以係有限既資源開創歷史既新一頁,真係幾過癮。好似聖女貞德咁樣,一開頭你要諗方法保護佢,你點樣控兵,揀邊條路都係到改寫緊法國既歷史,因為你行錯一條路,就會令貞德比敵軍殺死。又好似成吉思汗由一開始第一關係散落既部落去到最後一關係要同匈牙利人打仗,真係十足十當年成吉思汗橫掃歐洲既感覺。

如果唔玩任務,都可以玩番最正常既普通對戰,冇朋友同你玩都冇所謂,機友一樣可以同電腦打番場。千奇唔好睇小電腦,因為佢地係你最好既練習對手,唔係人人都夠佢地打。你中意弒君又得,一開始就咩都唔做,互相開片既死鬥又得,你中意係慢慢發展之後玩下快攻又得,你中意係個圍城入面又安全感又得,一個遊戲滿足哂作為君主既願望,真係爽到笑。

機友一定試過西班牙征服者、中國連弩兵、長弓兵仲有韓國馬戰車去拉兵屈機,呢樣唔係講少,真伙冇番咁上下技術都唔掂。

當人地仲係封建果陣,你已經學識如何速攻,話咁快就升左上城堡時代,用一隊隊騎士橫掃對方平民,係呢個時候當對手仲未有長槍兵,你就知道有馬係好過無馬了。

機友如果想發洩下既,真係玩死鬥就岩哂,咩都唔使諗,係咁起兵同人地打過,仲要開大埋個耳機,聽住刀刀槍槍撕殺既聲音,唔知點解心情又好番哂。

如果你問我咩模式係最令人又愛又恨既,我會答你一定係弒君,因為國王永遠都好難搵,同時如果你比人滅國,得番一個國王,只要你醒醒目目去同盟既城堡,就保證你唔使咁快輸。或者你夠醒目可以一擊即中,一野爆左人地個城堡,咁就叻仔唔使煩,否則真係搵到搵餐死。

AEGIS,細細個就係因為呢個世紀帝國既秘技令我搞亂左英文既AEIOU。呢個秘技最吸引人既地方係人有你有,可以快快手手黎一場君子之間既決戰,果種節奏既明快真係令人興奮到不得了。如果你同我講how do you turn this on,或者係限資源,我會睇你唔起,因為你唔係一個君子,你只係一個屈人機既小人,你係比出賣朋友既機友更不知所謂,因為人冇你有,咁樣玩法仲有意思咩?我真係諗唔到有咩可以頂得住眼鏡蛇車。

200人口呢個數唔多唔少對於中意大型戰鬥場面既機友黎講,真係唔太夠,正正係咁先會有地圖編輯模式。係呢個模式入面,只要你有心機,香港都可以比你整到出黎,想呈現咩既歷史情景都冇問題。只要機友電腦夠勁,咩野劇情都可以自己設計,唔想煩既可以下載網友作品,有時候真係網友設計既作品先至夠喉,冇限出兵8打8,真係要幾爽有幾爽。或者你享受大型閱兵既,都可以將世紀帝國入面有既兵種,全部放哂出黎,真係勁過中共國慶閱兵。

如果機友們既朋友仔都係世紀帝國迷,真係會開心死,因為你會享受到咩叫出賣同埋友情。為左搞事,你可以去到幾盡?有時4打4,點知你個朋友仔明明同你係同盟,冇啦啦就派哂成隊人入黎城門,原本都唔知佢想點,但突然間佢同你變左敵對,城入面冇兵,真係等比佢滅城。下次就我就醒目,見到成班友係我城門就快快手lock左佢,到時打起上黎都可以頂番一陣。可惜朋友永遠都係信唔過,佢可以調投石車炸死哂你d兵,但佢又唔係敵對喎,呢個時候你除左炸粗之外,真係咩都做唔到。

有時比人打到滅城果時,就係友情既考驗,到底朋友會派兵幫手,得你由得你死,最多幫你保住個村民復國呢?大部份一定係後者,話哂你都比人打到滅國,幫你有鬼用咩?呢個時候如果係弒君,朋友死之前一定會派個國王去同盟城堡,呢個時候,你可以先問朋友借糧,當佢比哂所有野你,就係你出賣佢,輸做敵對既時候。

唔好問點解朋友要出賣你,因為我只係覺得咁先係最好玩,最開心,係一個互相爆粗既場面。

世紀帝國對於每個人既回憶都有唔同既意義,因為呢隻game,我學識左中學大學永遠唔會教既歷史,因為呢隻game,我同朋友既互動多左,每日都係電腦面對嘻嘻哈哈咁過,番學、放學、亂做功課、睇卡通、打世妃帝國,童年時就如此經過。因為呢隻game,可能唔少人既設計天份係地圖編輯果時被培養,因為呢隻game,可能令到你一嘗做統治者既味道。

依家既我,只係想搵番一班投身左社會既知音人,同我再打番場世紀帝國,一隻唔使燒錢,又可以快快手手完場既game。

 

作者:筆知所謂

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 145086
Date: 2016-11-01 15:49:18
Generated at: 2021-12-09 06:50:19
Permalink: https://www.vjmedia.com.hk/articles/2016/11/01/145086/細細個因為aegis令我搞亂aeiou