團結香港基金,連我地呢D 上岸老屎忽都團結唔到呀!

 

我見到團結香港基金岩岩出左份報告講香港經濟前景。作者或研究團隊,唔係德高望重既經濟學教授,就係精於統計或者計算經濟既研究人員。我叫到勉強飛住黎睇,都大致知道佢地想講咩,當然唔會意圖(亦無資格)去質疑團隊既智慧以及研究方法。佢地其實講既結論,亦都唔係咩新聞,好WOW:

1. 香港要維持細小開放經濟體,唔好孤立自己
2. 香港要繼續鞏固自己既國際貿易樞紐地位
3. 中國經濟發展一日千里。即使進入咩新常態,香港大把商機
4. 香港人口老化,輸入內地人才係解決辦法之一

就算我當以上既說法係無可辯駁,係依家香港所面對既政治經濟形勢,亦都完全係不合時宜。你話岩岩九七回歸拋出呢種論調,我諗都可能仲有多少人嘗試理解。例如岩岩出CEPA,都好多香港人真係入去打生打死,結果鬧到灰頭灰臉鋪都俾人鋪都封埋。全世界都知同強國合作,可帶來GDP增長,但同時大家亦知道會有相當唔辣,抱薪救火既一面,唔知個炸彈幾時爆。係要膽驚受怕,與虎同眠,定係完全切割,樂得清靜?點樣平衡?呢個就係依家成個世界既博奕黎。

或者我地唔好走到咁深入,講番香港。面對政治既亂局,新一代對強國同政府既完全不信任,近五至十年來大量新移民同內地遊客湧入社會做成既種種問題,未得到解決,再提出呢種新瓶舊酒,唔好講依家D後生,我地呢一輩都一定唔會聽得入耳。你話要抱擁內地,我就話俾佢調番轉CROWD-OUT。再者,當大陸喉管有鉛,當有人係你屋企門口周街痾屎,當東江水原來超貴,當上面金融貨幣不穩直接影響香港經濟體系,等等等等,就算你係幾地位崇高既學者,都唔會有任何說服力。呢個係政治現實。

你個名叫做團結香港基金,我諗目的無容置疑係想團結香港。但係依家踢份咁既報告出黎,講堆咁野,我真心唔知可以團結到D乜七,你分析幾SOLID都無用啦。你話提供另一個角度,講番一句半句,去嘗試解決番當前問題都話。好似當初689話咩香港營,大家要上下一心,有條鐵咩?依家結果真係有個香港營搞左出左黎,不過已經係講獨。如果都無人覺得報告入面既野會WORK,會FLY,寫黎做乜,究竟係俾咩觀眾去聽?一陣鞋油味。大家心知肚明。

成日覺得經濟學發展左一二百年之後,變得離地,有強權無公理(或者係有心人故意歪曲利用)。當讀完一兩年基本入門理論,係人都識牙斬斬講,人就係自私既,出黎做生意就係講利潤最大化,有理無理,賺盡係RATIONAL!加租就係合理。管制就係防礙市場調節。影響到人咩?得架啦,佢地會自己傾掂數,到時有人會賠償你損失。但最後係咪真係有人賠。GOD KNOWS。經濟理論,唔講到咁TAIL架係。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 145088
Date: 2016-11-01 13:44:14
Generated at: 2021-10-27 11:19:04
Permalink: https://www.vjmedia.com.hk/articles/2016/11/01/145088/團結香港基金,連我地呢d-上岸老屎忽都團結唔到呀