以前既警察有「皇家」兩隻字,好似零舍正氣咁

 

依家警察既形象衰到貼地,多數不由分說,已經被自動定義為『黑警』,無須多講。但以前仲有女皇頭果陣,一切好似又唔同講法。

當然,殖民地時代香港警察都仆街過,而且仲曾經係相當仆街添。但係經過好多人好多代既努力,加上有埋廉記,搞左好耐,先至慢慢提升番警隊專業形象。最後得到事頭婆冠名加持,叫得『皇家香港警察』,堪稱金漆招牌,香港市民既認同佢地係真係做到野,正義執法,保護市民生命財產,皇室亦認可,先至有咁既封號。

日本曾經有套陪我地成長既動畫,原名叫逮捕令,香港無線係譯「皇家雙妹嘜」,我相信果陣好多人都鍾意睇。兩位女主角,一個力量衝動,一個智慧溫婉,雖然只係做交通警,但係竟然可以勁到去捉持槍劫匪。作者係藤島康介(即係岩岩娶左J級靚模既一條飯剷頭),畫車同畫女一樣畫到咁正,兩女堪稱才貌雙全,一齊執勤又會爆出唔少笑料。係一套既認真又溫馨既小品,果陣深受歡迎。

依家諗番起,大家果陣就算見到標題唔啦更「皇家」,但係完全受落,我信因為係好多香港人果陣既心目中,兩個字已經等同「警察」(無咩人會諗起皇家天文台卦?),甚至係「好警察」,就好似動畫入面既墨東警察,無個壞人,唔好亂咁拉人,係正義同勇氣既化身一樣,去認真做好應份既責任,儆惡懲奸。

又咁講,舊時少不更事,梗以為警察叔叔全部都係好人啦,有事要打九九九呀。上代人舊時講「好仔唔當差」、「兵即係賊」,好唔容易先洗得甩。依家風水輪流轉,又再黎過,你都咪話唔唏噓。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 145164
Date: 2016-11-02 15:42:41
Generated at: 2021-10-21 05:53:20
Permalink: https://www.vjmedia.com.hk/articles/2016/11/02/145164/以前既警察有「皇家」兩隻字,好似零舍正氣咁