結界列傳——西貢結界的形成

 

咩係結界?根據佛教如本法師講法:

結界原是佛門中的專有名詞,亦是術語。凡建伽藍,或作戒壇,所行的一種作法,而定其區域境界也。其作法所限定之地,謂之結界地。 結夏亦是佛門的專有名詞,亦是術語。結夏即結夏安居是也。結者結成之意。

資持記云:『立心止住,名為結耳。』

荊楚歲時記云:『四月十五日至七月十五日,天下僧尼就禪剎掛搭,精進禪法或修證,謂之結夏。』

簡單黎講即係一個不會受外界影響、有法力保護的活動範圍。

 

一般黎講 結界有以下幾種:

符結界——用符咒印製作既結界, 破解方法為整爛張符就得。

膜結界——由結界膜組成,具排外性,正常較難進入,到邊界位可以望到結界膜同周圍環境有唔同,較易發現形式係煙霧;如果唔覺意進入,要搵到核心中間位搵番粒符石,再破壞符石,先可以破除。

無形結界——話明無形結界,通常一般人入左同出番黎都唔知,進入同走出方法不詳;有自稱曾進入結界既老一輩山友分享指入左去既時間流動會同現實唔同,可能會快左或者慢左,你見到其他人但人地又見唔到你;同北大西洋既百幕達三角有異曲同工之妙。
點解當年英軍要同新界原居民打過先而唔係由西貢進入?相傳就係因為結界。
相傳日軍係修建西貢公路時有兩大隊人員失蹤,最後都無法尋回,多數都係走左入無形結界而出唔番黎。

 

由不同學說分析一下西貢點解會容易生成結界

 

地理學說

西貢係5億2,000萬年至2億5,000萬年前曾經係火山地帶,通過沉積作用形成沉積既酸性火山岩柱地質環境成為左現時既香港地質公園(世界上第26個地質公園)。

火山作用好可能令西貢地底蘊藏巨大範圍既磁鐵礦或其他具有磁場石頭,如水晶;

香港已知既有飛鵝山及馬鞍山礦場曾有鐵礦石出產。

1601301248411848-600x400

(西貢萬宜水庫六角岩)

 

能量學說

火山作用釋放出鉅大的能量,隨著西貢億年前一輪火山大爆發,不但地質有所改變,釋放出既能量令到西貢一帶能場(engery field)受到嚴重扭曲至今時今日,扭曲至今仍未回復平衡的能量水平。

身為低等物種人類,(一般)人類並唔可以平安咁越過呢種超越三維區域地帶。如果有人平安地越過,只係幸運。即係話,佢地越過呢種區域時,佢地咁岩遇到一帶磁場係平衡的水平。因此,(一般)人類到達或穿越呢種地區其實係非常危險。

 

鬼神學說

古時火山爆發釋放大量能量有可能招徠自然靈體,佛如中國老人、長輩們經常遇講既山鬼、鬼魅等。民間傳說,它們喜歡整惑山道行者(人類),但又未至於置其於死地。

不過,有時無心間接地害死人,例如佢地淨係想搞到人蕩失路,但山道行者因迷路時間太長,又斷水斷糧的情況下餓死缺水而死於山中。

民間傳說,有D山間的山鬼、鬼魅真係有惡意危害人類。佢地要吸取人既精氣與同命力,甚至攞命。當然神鬼學說只能參考,信則有不信則無。

 

風水學說

在風水學中經常會提到煞氣,「煞」即是傷人于無形的一種力量,如果不小心犯以,可能遭傷身破財的禍害。風水里的煞可分為形煞、氣煞、聲煞、光煞、風煞等。

 

土沉香與羅漢松

香港既土沉香同羅漢松因為佢地既價值,俾來自中國既偷砍者斬到一乾二淨;咁岩土沉香同羅漢松係常綠植物,特性係具陽氣,風水學上黎講係化煞效果極佳既風水植物;

西貢既土沉香同羅漢松俾人斬晒,自然較難化解煞氣,陽氣同旺氣難積聚,結界相對較容易形成;

 

12728856_10208375910297980_1058612767455755552_n_1024

植物中的黃金——土沉香

 

01300000426200128471961643243

羅漢松 「家有羅漢松。一世唔會窮」

 

西貢三尖煞

另一方面,西貢有3個尖峰 :分別為—蚺蛇尖、睇魚岩頂、釣魚翁

尖山係其中一種大煞,西貢一舍地方就存在住3個尖峰,風水學上黎講當然容易造成各種傷害,例如蚺蛇尖經常都有意外發生;

 

0

 

而蚺蛇尖—風水學上,蛇被歸類為凶獸,而且它會發出不良的靈動力去影響他人,代表冷血,陰邪化身;大嶼山鳳凰山心經簡林、西九文化區本來既規劃,都係毒蛇邪陣既例子;

一條大蚺蛇高高盤踞西貢,風水上當然是不祥,容易生成結界。

 

八卦

2005年丁利華探員失蹤案轟動全港,經過多年搜索但最後無功而回
以下呢段令人心寒文字相信好多人都睇過/聽過

流傳中較為詳細的對話:

接線生: 999
丁 : 我係行山架, 係西貢 586…
接線生: 咩事呀
丁 : 我行山, 迷途呀
接線生: 你迷途呀? 咁你係邊呀
丁 : 我而家位置 48 (停頓一會) 7020
接線生: 487020 呀? 係咪標柜柱?
丁 : 係, 係果個咩柱呀
接線生: 487020 呀嗎? 你慢慢講, 係乜野地方?
丁 : 等等….
(相隔 20秒)
接線生: 喂,
丁 : 等等
(相隔 30秒)
接線生: 你係咪行麥理浩徑呀
丁 : 係.西貢個頭黎架
接線生: 你係咪行麥理浩徑呀
丁 : 係., 冇錯
接線生: 你行緊邊一段
丁: 西貢個邊, 西貢東
接線生: 西貢東, 西貢o既東面, 由邊度出發
丁 : 由西貢北潭涌, 行左兩個幾鐘頭, 但係蕩失路, 而家企左係過左 58.., 5870 o既主要o既路
接線生: 5870 幾? 頭先你又話係 487020
丁 : 仲差少少咋
接線生: 有冇見到 M幾多, M 幾多, 你見唔見到呀
丁 : 仲差少少路程
(相隔 30秒)
接線生: 你見唔見到 M001呀, M011, M030呀
丁: 你等陣先
(相隔 20秒, 很多雜音)
丁 : 睇唔到呀!
接線生: 你淨係見到個 number, 咁個 number (487020) 刻係邊度呀?
丁 : 唔係d 柱, 係密碼,
接線生: 乜野密碼
丁: 可能我讀錯密碼啦

(接收不良,很多雜音)

接線生: 咁你仲係咪行麥理浩徑, 先生,你唔好行去個邊呀, 收得好差, 你唔好再行, 喂,喂, 你停係到, 我要問你問題
丁 : 你快d啦, 個 number 係……….
接線生: 你停係到, 你有冇扭親腳
丁 : 頂唔順呀
接線生: 你停係到, 你有冇扭親腳
接線生: 你幾多人係到
丁 : 我一個人
接線生: 要唔要救護車
丁 : 要
接線生: 你係唔係要救護車
(接線生接駁至救護車), 然後接線生與救護員通話及救護員問位置, 隔20秒)
丁 : 救命呀 (相隔5秒) 救命呀
救護員: 你要話比我聽你係邊
丁 : 最慘我唔記得條路
接線生: 先生呀, 喂 喂 喂
丁 : 救命呀 (相隔3秒) 救命呀 (已經再沒有丁的對話)
(接線生解釋收到電話後的情況給救護員知道, 救護員覆一次丁的手提電話號碼便收線)
接線生: 先生呀, 喂 喂 喂

(斷線)

好多人推測佢係入左結界出唔返黎失蹤,丁Sir失蹤日期為2005年09月12日,農曆為八月初八 戊戍日 天干屬陽土 地支亦屬陽土,即係艮上艮下 艮為山:卦象艮卦,山外有山,山相連。不動,靜止,停止,克制,沈穩、穩定,止其所欲,重擔。兩桌、兩床相連,上下鋪位,床上、桌下。測外出,不能出行,行人不歸。

 

1257364664227

 

中凶卦,停滯阻止之象,描述同結界不謀而合,丁Sir係咪走左入結界永遠出唔返黎?亦有人話佢係因為差人錢而搭港頭艇過左強國扮死左,定係遇到猛獸、山魅、非法入境者?真相,無人知曉……
如何破除「結界」?

備有地圖、指北針、園藝剪,然後永遠向上向山脊行即可,
落山落澗九成會進入「結界」,多數會因為中暑肚餓而產生幻覺,不自覺進入「結界」,
又或者真係進入結界而出唔返黎。

據消防處所提供的資料,近年因攀山搜救而出動的次數不斷增加,從二零一零年的一百五十次,上升至二零一四年的四百零三次,五年間搜救次數的升幅超過一倍。

點都好,行山千祈唔好自己一個,愈對自己能力有信心的人愈易出意外。
行山前帶齊備裝備糧食,求生用品,出發前應同家人講去邊度去幾耐,雨天不宜遠足,打風之後更加不應前往,
推薦大家用「50222遠足短訊留蹤」,行山人士只要將郊野公園遠足徑上標距柱編號,用短訊傳送至「50222」即可定位,萬一遇事,救援人員可盡快尋出位置,即使非智能手機亦可使用。

西貢除了結界,仲有很多隱藏於世的地方,大家不妨發掘一下。

 

hkhiker20160906tp005_1024 hkhiker20160906tp008_1024 11412630 p1000330

 

以上內容跟據個人對風水學的了解及其他傳說寫成,不為精密科學,只屬參考,如有出錯請留言告知,謝謝!

 

參考資料:

http://www.travelinsaikung.org.hk/
http://www.travelinsaikung.org.hk/Historical/view.aspx?menu=15&Nid=36
http://www.travelinsaikung.org.hk/Historical/view.aspx?menu=15&Nid=37

中國古著《山海經》
http://topick.hket.com/
http://www.kui.name/event/2009-01-14/

2011-11-16西貢行山客報警後離奇失蹤

201095行山客墮崖魂斷魔鬼山
20150914 中聯辦司機伏屍山坡
2015年10月07日 行山男遭墜石擊中 墮山澗重創
【行山失蹤】蔡維益失蹤第4日 屍浸溪澗
丁利華失蹤報案對話內容!

香港5大行山高危線

31/01/2007 行山漢人間蒸發

01-25 女子遠足時失足墮崖昏迷
08/10/2006 兩家感嘆中秋難團圓

作者:沙夶

沙夶
90後死廢青,熱愛生命,更愛玩命|興趣是美人美食攀山攝水玩貓玩樂。 人生觀:人一世物一世 |座右銘:怕咩丫,最多咪死 工作聯絡: Instagram: photography_sasa |Facebook: 攀山攝水

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 145186
Date: 2016-11-02 18:25:15
Generated at: 2021-05-18 17:07:25
Permalink: https://www.vjmedia.com.hk/articles/2016/11/02/145186/結界列傳-西貢結界的形成