當日上你屋企做2P 既死黨,都好難搵番佢喇

3dssnesfam

 

係我地既兒童時代,打機未叫做毒拎,最多只係叫機友。

機友都分三類。最有錢,而且行動力最高,無咩家長管束既,梗係落街打街機,享受跟機挑機既種種刺激同埋快感(高手一蚊打成日不在此列)。至於屋企家教比較嚴既,就唯有打家用機喇。

但係家用機都好XYZ貴,果陣買一盒帶就算幾十合一,都要幾百蚊,如果屋企有成個圖書館咁一盒盒原裝遊戲帶擺到成個書架滿左,呢條友一定有錢到好似叮噹入面個牙擦仔咁。以前係成日好羨慕D買得起正版帶既朋友仔,因為唔單止盒面靚,而且裡面仲有正版先有既「取及說明書」,印刷極之精美。(果陣唔識日文就係有邊讀邊架啦,我相信一定有人明我UP乜。)

打機本來係有$人玩意,但係係知識版權仍然係「咩黎架,食得架」既年代,所謂碟機既出現,完全地係打救到當時既草根階層,重新得到快樂童年。只要你搵到某商場入面有人肯幫你DUP碟,打開一本CATALOG,只要搵岩NO(唔好誤會唔係AV番號唔該),用膠碟抄GAME返去用咩超任博士、孖寶霸王去讀,幾蚊一隻,就已經可以咩GAME都打到,仲可以有金手指開外掛功能(所謂改GAME),勁正!

於是果陣家用機更加分裂成兩派:一派當然就係超級任天堂;而至於另外一派,自然就係所謂世嘉五代既MEGA-DRIVE。所以NO多數一個係SNE開頭,一個係MD,唔會搞錯。

超任係白色機,但係世五就係黑色機,好易認。打超任既,當然就係炸彈人,街霸,孖寶兄弟等等等等,但世五雖然無超任氣勢咁旺,但亦都有一堆忠實支持者。其中幾隻GAME,例如超音鼠,戰斧,格鬥三人組等等,都係當時極之膾炙人口既。暑假流流長,籃球場全部都係人,又嫌出面熱得滯?閂埋房門打家機,係相當理想既選擇。但當然你屋企人成日有時會KICK到開關製,果陣打機係無SAVE GAME,所以打到大佬先熄機,會嬲到夜晚食唔落飯。

依家好似話潮流興復古,連世五都係巴西重新生產連埋一堆經典GAME出售。但講咩呀,以前就話無錢;到依家有錢,就無時間。仲有你位2P既死黨,都唔知去左邊啦。當手掣都封晒塵,而連發係你心目中有另一個意味,對唔住講句,巴打,你既童年一早已經蕩然無存了。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 145205
Date: 2016-11-02 21:22:06
Generated at: 2021-12-05 08:01:22
Permalink: https://www.vjmedia.com.hk/articles/2016/11/02/145205/當日上你屋企做2p-既死黨,都好難搵番佢喇