大家有無諗過，香港究竟有幾多人係覺得釋法無問題甚至支持？

（人大網圖片）

可能好多人會預期我會就釋法既野再長篇大論，但ＳＯＲＲＹ，真係無咩可以講啦喎。有興趣既咪自行換下頭像，叫下最黑暗一日先。但叫完好諗定今晚去邊食飯喇。

幾年前，我決定唔寫長篇大論既小說，一方面係真係無人睇，紫波唔鍾意講故台個風氣，我亦意氣闌珊，索性去結婚算。第二件事係真係覺得應該寫多Ｄ野去關注時事，吸引更多既年青人可以針對時局去投入，去參與。但係其實寫左幾百篇又好，幾千篇又好，我係咪真係只係一直對住部牆講野呢，我係咪又真係令到更多同我差唔多年紀既人去諗下未來究竟可以做咩呢？我真係唔知。但我一早覺得自己叫完，其實都真係無咩用。純粹發下牙痕咁解。

而就算有好多人，同我一樣意識到問題，係度大聲疾呼左，咁又如何呢？唔係話叫唔叫醒既問題，而係最大問題係，香港有一大堆人會覺得根本無問題。唔係扮訓，而係由衷覺得成件事係無咩需要悲鳴呀嘛。等於兩個議員激嬲左阿爺，受罰就係好應該架啦，抵佢地死，連日好多呢Ｄ咁既論調架啦，甚至改圖咩都齊，第一件事，最緊要打死敵人先。唔釋法都內鬥到死果日為止。釋法唔釋法？真係咁重要？

我唔係專家，但睇古今歷史，法律本來都係死既，人先係生既。我寫法律，會唔會自己綁死自己咁蠢？我鍾意點扭點改都得。係喇，又話咩擔心咩破壞法治甚麼一國兩制喇，咁多年黎咁多事，仲存在唔存在先？或者又咁講，有堆已經係人大果堆香港人，咩田北辰呀，譚惠珠呀，成番都係香港出生香港人，係殖民地既時代既福蔭飛黃騰達，佢地依家會唔會夠雷話，香港人有人反對釋法呀，講句咩公道說話之類？梗係唔會有啦。到時梗係一致通過，唔好傻啦。

愛就係選擇，選擇就係放棄。仲咁天真到以為個個都好似你咁，當香港係咩家，我真係好愛香港。好多人都係愛既，愛個地方俾佢既利益渣，愛可以隨時去最貴既地方吃喝玩樂ＨＩＧＨ－ＴＥＡ渣。我鞏固左自己利益，基本法倒轉解都無所謂，食屎既係你地渣嘛。以後仲有個想從政？邊個想選議員？下？

依家人大釋法，做個民意調查，可能不知幾多人支持，好似當初６８９擔張凳出黎扮下寫野，Ｄ人就以為樓價會跌，成地滑潺潺到依家都未拖乾，民望幫佢上位。之後又揼春。哈哈。我唯一一句可以講既係，我會多謝兩位議員，進一步睇清香港部份人（唔單係政府）既醜陋面目。真係大開眼界既。係咁啦。

作者：鵝鑾鼻燈塔

前高登講故人。現為廢中。努力抵抗中年危機中。FB PAGE：https://www.facebook.com/Ellan.Ou/

閱讀後覺得好，請多多讚好及分享～：）