後生一個又一個跳樓,每個父母都應該小心地時刻反省

 

(photo via cc Flickr user ECBC聖道堂)

(photo via cc Flickr user ECBC聖道堂)

 

關於教育,我有更多野想談論。但係我唔打算詳談,只係會繼續意識流地講。

如果年青人自殺竟然成為潮流,甚至變成一種所謂既新常態,呢個社會既腐化程度,已經去到一個難以想像既地步。年青人既雛型,咪又係幼童。當中既教育方法,一定出現左好嚴重既問題,令到佢地係某些情況下,迫不得已要選擇結束自己既生命。而更病態既係,悲劇發生,每次仲有堆意見認為問題係出自青年人本身,毫無同情之心。咁樣儼然係一種另類既鞭屍。除左冷血之外,諗唔到其他形容詞。

我隱隱然覺得,以前即使係年輕人犯錯,都比較容易受到大眾所接受。老一輩成日都會講一句「佢腦囪都未生埋」,意思就係始終年紀尚輕,有時可能會唔識諗,係正常不過既事情,人生必經階段。而正正因為咁,大人理應有負上指導年青人既責任,亦應該給予機會,直至佢地可以自己獨立為止。

本來錯咪錯囉,NO BIG DEAL,幾時變左好似死罪咁?就係因為小學甚至更早,已經玩扣分制。一子錯,滿盤皆落索,竟然係童年出現。爭間小學,細又細鬥,大有大爭。況且,有時年輕人既想法根本唔係錯,只係佢唔明上一代人訂落既遊戲規則,而且唔想接受唶。但佢地無得揀,因為好容易又俾人話係叛逆,話係離群。反正年輕人好似做咩都動輒得咎架啦。

無人可以選擇誕唔誕生呢個世界,因為當初做決定既,係父母。咁生既權利既然本來就無,死既選擇相對而言,就係相當誘人既一個OPTION。我唔係鼓勵人去死,我只係想講,面對後生一個又一個跳樓,每個父母都應該小心地時刻反省,佢地究竟係咪用緊一個正確既APPROACH,去教佢地既細路。無人會知道,係依家咁失敗既教育,提早變成一個大人職場化既產業,細路係可以有幾FRAGILE。你真係知自己仔女依家諗咩咩?

我想像唔到如果自己仔女係我面前死我會點,我諗我會發癲。果種痛,大概會一世。但迫上絕路既,每一個人都有份。你唔好以為做父母一句為佢好就大晒。大把人就算唔死,都超憎自己屋企人。三十個興趣班,廿樣功課,八十分唔合格。我如果係細路,一定反檯。我諗好多人都會明我講緊乜。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 145072
Date: 2016-11-05 06:05:00
Generated at: 2021-10-28 03:40:12
Permalink: https://www.vjmedia.com.hk/articles/2016/11/05/145072/後生一個又一個跳樓,每個父母都應該小心地時刻