唔係個個返中環工都係三四百蚊一餐仲要開埋酒架

(photo via cc Flickr user Eddie Pak)

(photo via cc Flickr user Eddie Pak)

 

我覺得網上世界普遍對係中環返工既人有一D稍微不切實際既幻想。既然OT到悶悶地,不如我又嘗試現身說法,解釋一下:

首先係中環返工既,多數係唔會覺得高人一等的。你估真係個個都係IFC返工渣住杯咖啡就可以攬住條著住件一件頭摟X裙既正妹,再唔係就係成個曉治積曼既鬼佬,然後就每秒幾十萬上落咁咩。雖然話就話三十歲人仲搭地下鐵路返工係會好失敗,但你睇每朝八半去到中環紅色站落車,個個其實個西樣咪同你去炮台山返工一樣,係無分別的。中環高級D,係純粹一般人既自HIGH。

我就算俾你返銀行,SO WHAT,唔駛俾老闆捽咩?IBANK都就摺,仲天之驕子喎。依家最HIT(最打得)既工係立法會議員呀,尊貴架,仲中環,就算係都西環啦,ON9!

第二,我唔明點解去中環返工就代表出去食飯就會好貴囉。講到中環D快餐店死晒咁,我俾你五步有一大家樂,十步有一大快活呀。對面仲有美心MX,轉個街口出去就有吉野家啦。你話中環去食快餐唔岩身份?WELL,你試下一點去果堆餐廳睇下,咪又係爆到滿晒,仲有你眼望我眼係度用眼神屌人快D走唔好阻住張檯俾下個呀。再唔係咪去食茶餐廳囉,粉麵囉,一定唔會過百先。當然你可以仆上去半山食三四百蚊一餐既。鍾意開埋酒都仲得添,但都係好似第一段咁講,呢D CASE少D囉。

咁又的而且確,出街食係好多味精我都明既。而我自己返某份工,都曾經試過為左慳錢(即係為塔嫂打生打死果陣),連三十蚊飯盒都唔捨得食而去帶飯既。帶飯的確有益,而且連辦公室都唔駛出,可以MON住個市又趁機上下高登係幾爽。但係當日子變得愈黎愈多OT,你愈黎愈覺得個CUBICLE似監倉果陣,你就算用兩個字,你都想出去呼吸一下新鮮空氣。唔係講笑架,睇美劇D死囚呀,都可以揀唔中出去打下籃球射下波,扭扭頸骨鬆鬆手啦。雖然到最後要入番去,但起碼唔會俾四部牆迫到癲先啦。

以上完全係個人經驗黎。不過我都明既。普遍香港人睇開咩葉朗程呀,王迪詩呀,食個TEA都要過半島呀,去LANDMARK呀,係有既。但老實,你話我酸葡萄好鹹葡萄好,人工再高都唔一定要行呢個LIFESTYLE囉。係咁先。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 145448
Date: 2016-11-05 21:54:31
Generated at: 2021-10-20 12:21:00
Permalink: https://www.vjmedia.com.hk/articles/2016/11/05/145448/唔係個個返中環工都係三四百蚊一餐仲要開埋酒架