我最佩服既香港作家之一,倪匡必然係榜上有名

 

 

話說有人將倪匡既舊作拎返出黎,話點樣預言香港毀滅點勁點勁,又引起一連串讚嘆。原來依家COMMON SENSE真係咁大市場。其實如果即刻有人去訪問佢,佢一定會哈哈哈哈一輪之後:

呢D係常理,有咩好奇怪唶?香港人真係怪之極矣!

已經唔止一次講過,我最佩服既香港作家之一,倪匡必然係榜上有名。有人話佢文筆不過爾爾,但係最令人驚訝既係佢對人性醜惡既果種觀察入微同埋透徹,以及佢由始至終都反共,從來無改變立場。呢個當然係同佢既出身有極大理由,佢當過兵,但係因為凍得滯,燒左一條木橋取暖,但係咁樣做,卻係死罪。自知大難臨頭,於是佢只有逃離隊伍,南下香港。

係香港,佢感受到自由既風氣,明白辛勞之後換來一餐飽飯既滿足感,就算只係係報紙度做執字粒,都好,令佢一世都記得一碗叉燒飯既香味,而係香港,佢先可以隨心所欲寫佢鍾意既野,令佢既天馬行空,不單換黎生活穩定,甚至得以累積巨富。係人都知,倪匡從不拖稿,但係稿費貴絕全行,而且時常不斷加價,甚至令金庸都大感頭痛。我諗,呢個同佢曾經困苦同顛沛流離,亦大有關係。邊個都唔想再返去果種生活,自然要及早未雨綢繆,積穀防饑。

相信係香港,係無人會敢批評倪匡係回歸之後就即刻移民外國。因為佢亦都坦言,呢個係當然出於佢既恐懼,亦都了解時局一早已定,係不可以轉逆。出於作家既直覺,同埋強勁既觀察力,自然就有準繩既洞察力。既然如此,不如早去。雖然近年佢返左黎,但唔係代表佢相信希望,反而只係代表佢年事已高,不怕死(佢不諱言,想早D死,周身病不好玩)。佢接受訪問,亦都繼續話:上面講既野,根本係一句都不能夠相信。

其實佢筆下寫政權既醜陋,又點止呢一本。大家如果想睇佢點演繹同諷刺十年瘋狂顛覆人性倫理既地球浩劫,應該睇埋《風水》。但要留意係無呢個書名,因為篇野係作為中篇小說,匿藏左係明窗出版社衛斯理系列入面既其中一本。心水清既朋友,就會知道。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 145642
Date: 2016-11-09 15:55:11
Generated at: 2021-10-28 03:59:33
Permalink: https://www.vjmedia.com.hk/articles/2016/11/09/145642/我最佩服既香港作家之一,倪匡必然係榜上有名