一個好roommate 真係一生難求

 

(photo via cc Flickr user Ben Kraan Architecten BNA)

(photo via cc Flickr user Ben Kraan Architecten BNA)

 

宿舍對於大學生黎講,可以係一個社交場所、可以係一個訓練獨立既地方、又可以係方便番學既暫居地。你可以投放全副精神令自己主修hall life副修讀書,又可以一d感情都唔放係宿舍,好似輕輕的我走,正如我輕輕的來,將一年的生活點滴完全拋之腦後,唔帶走任何情感。當你匿係房入面,唔想同層友有任何接觸都好,有一個人,你點都要朝見口晚見面,果個就係roommate!

Roommate黎講,首先講下佢地可以有幾好先。

 

當你唔舒服果時,佢會照顧你。

所謂人在異地,唔舒服果時自然要有一個人去照顧你。呢個時候roommate會幫你買粥同買藥,或者係陪你去睇醫生。知你發冷就會夏天都唔開冷氣,寧願自己熱小小都怕你凍親。最難得既就係,當你夜晚係咁咳果時,唔會埋怨你嘈到佢訓唔著,而係比杯熱水你飲。

 

大家作息時間係互相遷就

有時你聽日要番早,咁佢會自動自覺關房燈,唔會光到你訓唔到。同時佢都要將聲音收細,就算要玩既都係出去玩,而唔係留係房入面嘈嘈閉,搞到你休息唔到。當你校鬧鐘果時,佢都唔會介意你嘈醒佢。

 

你既野係我既野

做人就千奇唔好斤斤計較,否則就真係好難識到朋友。有時候你肚餓,但係間房冇哂野食果時,你就可以好隨便咁拎roommate既野食,佢可能要你下次買埋比佢,但絕大多數既情況之下都唔使還。有時你用哂d牙膏、淋浴露、洗頭水,唔使問你既好roommate都係會借比你。就連衫都可以借比你,呢d就真係叫做好roommate。

 

孖公仔形影不離

慢慢地,你就會同roommate發展出一樣既生活模式,食飯又好,睇電影又好,打機又好,你第一個搵既,都係身邊既roommate,一黎就手,二黎就夠哂老友,到最後大家做咩都會離唔開大家,做功課又好,溫書又好,咩都要同佢做。

 

同對方唔再存在禮貌兩個字

你同roommate唔存在禮貌兩個字,唔代表你唔尊重佢,相反係你同佢已經成為好朋友,所以門面功夫根本唔使做。講粗口、屌阿媽呢d野已經唔再係問題,因為大家每一句都係粗口!你可以毫無保留咁展示最真實既一面比對方睇,講下女同學又得,賭下錢又得。

可惜既係唔少人往往遇著一個同你唔夾既roommate,咁你黎緊果年真係會唔太開心,什至係提早quit hall。

 

宿舍變做圖書館。

咩野叫做圖書館?就係大家番到宿舍都唔會出聲。有d人番到房入面,唔知點解硬係唔中意出聲,只係玩住自己部電話或者自己一個人係到打機。另一種人就係過度認真同埋努力,當然呢種情況之下佢係冇錯,但遇到只係埋頭苦幹既佢地,就好似住係一人房一樣,悶到死。另一種情況係佢十分之active,但係只限同成層既人或者出面既人,所以成日見佢唔到,見到佢既時候,佢已經攰到訓左,到最後自己都係悶住係間房到。

 

生活作息唔協調

有時候一個早訓一個夜訓都唔係最大問題,只有識得遷就。但往往有人好中意朝早上堂,但係唔只校一、兩個鬧鐘,而每幾分鐘一個,最慘就係佢未醒反而你就醒,仲要最後佢慢慢咁熄最後一個鐘,再同你講今日都係走堂。既然呢堂可以走,做咩仲要校咁多個鬧鐘呢?另一方面,夜晚人地要訓教就唔熄房燈,但當自己要訓教果時,就要求人地熄埋臺頭燈,呢種人係台灣人既眼中叫做「雞巴」。

 

周圍講室友是非

有時候係房就緊係會想放鬆小小,唔使下下都正襟危坐,咬下指甲啊,打下鼻寒呢家野就唔多唔少都會有,或者直頭係房入面只係著底褲訓教。另一方面,2個室友係漫漫長夜到傾下心事就少不了,大家一時興起就會講人事非,所謂呢到講就呢到散。最怕既人室友會用自己既生活習慣作為同層友打開話題既方法,不停係笑你唱你,呢d或者可以忍,但最慘既係佢會將你同佢既事非講比人聽,大學又有幾大呢?一個傳一個,好快就傳到受害者耳邊,到時咪大家都難受,大家都面阻阻,所以有時真係收下把口啦。

 

做野冇黎手尾,污糟到死

間房就2個人都有份住既,可惜就唔係個個都會咁注重清潔。例如室友成日係房到食薯片,食到成個地下都係,飲完可樂又就咁放係間房到,引黎一大班螞蟻作亂。如果係幾個人共用一個廁所,佢就會屙尿屙到周圍都係,搞到廁所有浸味,要幾恐怖有幾恐怖。而且佢永遠都會指望你幫佢執野,或者係拖地,當然最後大家都會唔拖地,眼白白睇住個地下污糟成年。

 

作者:筆知所謂

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 145888
Date: 2016-11-13 17:40:00
Generated at: 2021-12-09 05:44:35
Permalink: https://www.vjmedia.com.hk/articles/2016/11/13/145888/一個好roommate-真係一生難求