咁既時勢,痴痴地既人得到權力,都唔係咁難去理解

 

今次美國大選既故事,我認為係二零零八年金融海嘯既後續劇。當時既衝擊實在係太巨大,成個世界到依家根本都無法自我修復,就好似一個閂唔埋既黑洞咁。零八年後,世界局勢一直不穩,餘震不斷係度,後續影響亦一直係度。直到依家仍然無一個經濟學家可以有一個好既理論黎到自圓其說解釋所有野,更加唔好講話為問題提供一個解決方案。

好多人可能都無察覺到,當全世界都充斥著大量現金既時候,股市上漲,物業價格上升,利率變為負數,已經無人再關心所謂既基本盤——儘管咁多年黎已經又有希臘脫歐、英國脫歐、歐元區解體危機、中國債務危機,日本通縮陷阱。。。成台戲從來未完過。世界經濟都係一池死水,不過香港人只係會關心騰訊股價,深港通幾時先正式通車,其他野一於少理。

有D人可以收復大部份失地,但亦有堆人從來無翻過身,面前亦睇唔到有任何機會俾佢地。不論社會地位,收入同財富方面,成個世界都變得更加不平等。與此同時,全球進入左一個無法信任亦不講邏輯的新時代。相比起客觀公正的數據或者日常觀察,我們更倚靠主觀感覺,以直覺行事。拒絕分析,高舉TLDR旗幟。認真反而輸了,輸得一窮二白。咁既環境,當然會滋生民粹主義同保護主義。係某些人既睇法,自由貿易、全球化已經成為一個必須被推倒既騙局。

係咁既情況下,D睇落痴痴地既人得到權力,變得唔係咁難去理解。我地認為佢地係癲既同時,有D人會認為佢地係救世主。史上亦見唔少極端例子,例如希特勒同毛澤東係佢地既時代,何嘗未做過民族英雄?只要佢地可以令到有一班人帶來一D好既變化,而佢地又對呢個結果感到滿意,點解唔支持?尤其係當佢地已經再無其他野可以輸既時候,一切虛妄都可以成為希望。

民主可能係一個唔錯既制度,但係,當每一個人既行為都變得唔能夠用常規去猜度既時候,制度亦都唔可以保證會帶來好既結果。到最後,只能夠係整個社會一齊去承擔——大概係兩極既冰融晒之前,我地有生之年,都可能睇到個大結局了。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 145969
Date: 2016-11-15 05:09:24
Generated at: 2021-10-21 07:02:40
Permalink: https://www.vjmedia.com.hk/articles/2016/11/15/145969/咁既時勢,痴痴地既人得到權力,都唔係咁難去理