知唔知點解蝦煮熟左,會由灰色變成橙紅色?

(photo via cc Flicke user Cooking etc.)

(photo via cc Flicke user Cooking etc.)

 

知唔知點解蝦煮熟左,會由灰色變成橙紅色?
  
就等於我再問你,點解天氣好果陣天色係藍色唔係紫色?而夕陽西下果陣點解個天又會變左紅色,呢D問題都唔係咁容易三時兩刻可以講清楚係咪?咁點解呢類問題會變成中學入學既面試問題呢?難得訪問幾個校長,佢地幾個都振振有詞,話唔識答呢就正常既,但一致認同,可以考下小朋友既反應、創造力,同對科學研究既好奇心等等諸如此類。。。
   
正確答案如果大家有興趣可以自己去GOOGLE下咩係蝦紅素,呢度就唔詳細講,但我可以坦白利申先我幾十歲人都依家,係唔識咩係蝦紅素既。另外,我絕對唔明答唔到蝦煮熟變色,同科研人才可以有咩大關係。咁點解連好多大人都唔識答既問題,要拎去問小朋友去考反應先?我地究竟需要小朋友係一個咩環境度成長呀?
 
咁搵我出都得啦,出到有咁深得咁深都考到反應啦,例如火箭推進器既構造呀,一般衍生工具產品既定價呀,莎士比亞既四大悲劇呀,微積分基本定理呀,然後搞喊左人唔識答就話,唉都唔識講D有創意答案,社會需要呢D人才呀。。。
   
另外,我唔知道依家係咪真係個個屋企都咁富貴,日日都已經可以食到山珍海錯。我以前就係窮等人家,細個好少有海鮮有得食,日日煎蛋扒白飯又一餐。我斷估去街市買一斤蝦都要百幾蚊啦下嘩?咁如果細蚊仔無乜食過蝦煮過,而書本又無教過蝦煮熟會變色,咁唔識答,有咩咁出奇唶,點考咩日常觀察力?小朋友咁忙仲有時間去街市咩?
 
成日話教育要人人平等,其實咪又係係呢D關節眼將低收入家庭篩左出去。你唔好問小朋友知唔知坐頭等比坐經濟貴幾多錢?係個機艙可以舒服幾多,試舉例說明之?社會問點解依家小朋友咁大壓力,點解咁多人去跳樓自殺。睇得愈黎愈多呢D新聞,我真係明晒。最正係個個都話咁樣岩呀,好呀。小朋友點諗,我理得佢地啦,佢地真係跳樓我地再默哀,然後出份報告,話同教育制度無必然關係囉。完。

 

(編按:識答條問題,就梗係由視網膜感光細胞點樣分辨不同波長的光再化為神經脈衝傳去個腦度分析開始答啦,唔知值幾多十篇博士論文呢?謎之聲:「乜係波長?」)

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 146006
Date: 2016-11-15 14:08:13
Generated at: 2021-10-21 08:03:06
Permalink: https://www.vjmedia.com.hk/articles/2016/11/15/146006/知唔知點解蝦煮熟左,會由灰色變成橙紅色?