文革個陣,都係人與人互相撕咬

 

有一次返鄉下,我阿婆同我講起果陣文革,點解會突然俾人批鬥。

『其實是無得解!』阿婆生前,雖有鄉音,但答得乾脆,擲地有聲。佢話,可能大家心裡面都覺得此時此刻,自以為有一個神靈裨佑,而且可以做任何野,都唔需要負上任何責任。係惡向膽邊生亦都絕對合法甚至備受褒獎既時代,只要睇唔順眼邊個,就可以批鬥邊個。

阿婆話自己有次做有關無產革命點推展既匯報做得唔好,所以就乘機俾人鬥。俾人鬥,只能夠唔反抗地忍辱負重,或者你自行了斷。批鬥既野,簡單又分文鬥同武鬥,武鬥自然打到你飛起,酷刑用盡,你頂唔順的話,自然會俾人活生生打死,然後棄屍荒野(或者肉體俾人分而食之)。但阿婆話,文鬥雖然聽落好D,但一樣死得人多。

當你日日俾人精神煎熬,將你既命推到去地底泥咁賤,鋪天蓋地都係鬧你同埋你祖宗十八代既所有野,而你既朋友同親戚都唔敢幫你出聲,甚至鬥埋你一份果陣,或者唔俾你訓,或者不斷吊住你腳唔落地,或者唔俾野你食唔俾水你飲,果個人食人既恐怖世界,根本就慘過死後既地獄,所以好多人都會頂唔順,自殺而亡。阿婆果陣好彩,委員會覺得佢罪犯不致於死,饒左佢一命,由佢寫悔過書算數。如果唔係,就無我阿媽亦自然無我係世上既一日。

我有一段時間不斷去研究文革既歷史,睇文革既片,有時睇到太殘忍,食唔落飯。因為實在太恐怖係在於,個情況甚至唔係兩國敵對既戰爭,而係莫名其妙一堆人忽然失控互相廝咬,如同喪屍。我唔明白呢段人類歷史,係咩一回事。但我了解到,只要條件許可,果種瘋狂,絕對可以係今時今日,再度釋放。下晝,我立過下堆宣判後既各方留言,我就已經有果種強烈食不下嚥既作嘔感覺。

讀歷史,然後試圖追撫今昔,最後,往往都有種刻骨銘心既諷刺。人類應唔應該被救贖?我真係寧願人類末日好過。地球過得更好。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 146034
Date: 2016-11-15 21:01:24
Generated at: 2021-10-28 04:34:09
Permalink: https://www.vjmedia.com.hk/articles/2016/11/15/146034/文革個陣,都係人與人互相撕咬