「庖丁解牛其實係武林絕學。」

 

(photo via cc Flickr user Thomas Maluck)

(photo via cc Flickr user Thomas Maluck)

 

依家好多既所謂怪獸家長,都口口聲聲都話掟個仔入去田鼠輪度搏老命跑,一邊含晒淚,係為佢地好架。但佢地一方面又竟然奢望孩子可以健康快樂成長,何其諷刺。好明顯當日讀篇庖丁解牛,係無讀到入腦啦?我就對成篇野記得仲好清楚,因為阿SIR教得超好:

佢話:庖丁解牛其實係武林絕學。

呢句話一出,全班人即刻洗耳恭聽。點解劏牛條友可以一邊劏牛一邊好似跳晒舞咁,而且岩晒節拍同韻律?呢個就係境界。而境界係需要自己去領悟,呢個就係一種道。由普通人一個月換刀,到一年換一次刀,直至呢位庖丁竟然十九年都未換一刀,就係因為佢已經對牛既構造充份理解,由一般既視覺層次去解剖,變成一種感覺,順大自然肌理而行,揀最柔軟去落手,所以佢眼前既雖然仲係牛,但係佢心入面,已經唔再係牛。呢個絕對係武林高手所捕捉到既避重而就輕既法則。

大家要記住庖丁解牛既最後一句,係:文惠君曰:「善哉!吾聞庖丁之言,得養生焉。」文惠君聽完庖丁絕技解說,STANDING OVATION彈起身拍掌叫好,當然唔係只係欣賞庖丁絕學劏牛當到「如土委地」咁簡單,而係佢意有所得,佢從劏牛,明白養生呢個重點道理。呢個先係成篇文既重點。莊子係呢篇養生主都算好人,講到D野咁白。配合番一開頭:

吾生也有涯,而知也無涯。以有涯隨無涯,殆已!已而為知者,殆而已矣!所有野已經明白晒,亦都呼之欲出了。莊子其實係度屌緊你地:條命得咁多,但維基百科就咁多條目,你咪睇囉,睇到你仆街都未睇完,明知係死路一條,仲去行,咪死多二錢重囉。庖丁解牛其實就係講緊個咁顯淺既道理。但係咁多年輕家長讀過呢篇書,對此完全視而不見,仲係咁推D細路去走條咁既荊棘之路。

所以我成日都講,讀中文係廢架,無用架。講咩熱愛中國文化,擁抱中國文學呀,徙氣。到最後又係7背完,連入面講咩都未知。香港人注定永遠停留係呢個水平。我預左又俾人鬧:到時你做家長咪知囉。你梗係講得口響啦。係架。我無所謂。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 146013
Date: 2016-11-16 20:25:25
Generated at: 2021-12-09 19:18:21
Permalink: https://www.vjmedia.com.hk/articles/2016/11/16/146013/「庖丁解牛其實係武林絕學。」